طالبان هڅه کوي چې دا ځل د حجاب نه مراعتولو په نوم د ښځو ځپلو ته دوام ورکړي
طالبان د افغانستان په څېر مذهبي ټولنې په څېر ټولنه کې د حجاب بهانه رامخکې کوي او په دې نوم د ښځو ضد حرکتونو ته دوام ورکوي.
په افغانستان کې د هېڅ ښځې حجاب د اسلام له مبارک دین له امر سره سم دی، خو طالبان بیا په چادري ټینګار کوي چې هېڅ شرعي اساس نه لري.
تازه د امربالمعروف او نهې عن المنکر وزارت مرستیال محمد فقیر محمدي د حجاب ترویجولو په نوم، د دوی د اړوند وزارت د ځپونکو اقداماتو پر دوام ټینګار او د دغو اقداماتو ننګه کړې.
نوموړي له یوې خصوصي رسنۍ سره د مرکې پر مهال ویلي، چې حجاب د دوی امر نه؛ بلکې د خدای امر دی او افغانان یې سل په سله ملاتړي دي.
طالبان د حجاب په بهانه د خلکو ناموس ته درېږي
طالبان په دې نه دي خبر چې د حجاب په نوم د خلکو ناموس ته په افغاني ټولنه کې درېدل کوم ډول عکس العملونه لري. دوی د نورو خلکو ناموس ته په لار کې درېږي او د حجاب په نوم چې ښځینه پولیسې هم ورسره نه وي، موټرو ته خېژوي او حوزو ته یې انتقالوي.
نور ولولئ: طالبان افغانستان کې ښځې له کار او زده کړو منع کوي، خو بهر کې له نیم لوڅو سره انځورونه اخلي
نور ولولئ: افغان ښځې له طالبانو د دوی پر زدهکړو او کار د محدودیتونو ختمول غواړي
نور ولولئ: ملګري ملتونه وايي، طالبان له تاوتریخوالي سره مخ ښځې د ژغورلو په خاطر زندان ته لېږي
هغه نه دي ویلي، چې مخکې افغان ښځې بې حجابه وې کنه، خو په دې تړاو د طالبانو د رژیم کړنې په پراخه کچه د افغانانو له توندو غبرګونونو سره مخ دي.
د دوی په باور، طالب چارواکي په دې پلمه د خلکو خصوصي حریم نقضوي، سپکاوی ور اړوي او دا چارې به یې د پراخ ولسي نفرت او ناوړه پایلو هڅونکې شي.
د بیان ازادي له خلکو سلب شوي ده
د طالبانو له دغو اقداماتو سره که څه هم د بیان ازادۍ د نشتوالي له امله هېواد مېشتي افغانان مخالفت نه شي کولای، خو ډېرو بهر مېشتو یې دا کړنې نقد کړي.
د بشري حقونو د یو شمېر نړیوالو سازمانونو په ګډون یو شمېر نړیوالو دیپلوماتیکو بنسټونو او له هغې ډلې یوناما او د امریکا بهرنیو چارو وزارت هم په دې اړه اندېښنه ښودلې او له طالبانو څخه یې د افراطي کړنو د پای ته رسولو غوښتنه کړې ده.
طالب چارواکو بیا له دې کړنو دفاع کړې او ویاند یې ذبیح الله مجاهد یوناما ادارې ته په یوه غبرګون کې په دې تړاو د نه تبصرو خبرداری ورکړی.
د یادونې وړ ده چې د طالبانو پر دغه اقدام زیات افغانان نیوکه کوي او ددوی دغه چاره له افغاني فرهنګ څخه سرغړونه بولي.
