لوفتهانزا د جرمني حکومت ته د افغانانو د تخلیې لګښتونو څو میلیوني یورو بېل استولی
لوفتهانزا د جرمني حکومت ته د افغانانو د تخلیې لګښتونو څو میلیوني یورو بېل استولی
د جرمني هوايي شرکت لوفتهانزا له کابل څخه په۲۰۲۱ کال کې د افغانانو دتخلیې عملیاتو د لګښتونو په تړاو د اولاف شولڅ په مشرۍ فدرالي حکومت نه څو میلیونه یورو غوښتنه کړې ده.
شپیګل مجلې د جرمني د بهرنیو چارو وزارت د محرمو اسنادو په حواله رپوټ ورکړی، چې په ۲۰۲۱ کال کې د افغانانو د تخلیې عملیاتو کې ۳۱ ځانګړې الوتنې شاملې وې چې لوفتهانزا او یوه بل هوايي شرکت ترسره کړې.
د بېل له لارې د پیسو تر لاسه کول
لوفتهانزا شاوخوا پنځه میلیونه یورو غوښتې، چې ویل کیږي دا پیسې باید د بېل له ترلاسه کولو سره سمې ورکړل شوې وای.
شپیګل وايي، د هغه وخت د جرمني د بهرنیو چارو وزیر هایکو ماس او د لوفتهانزا رییس کاستن سپوهر ژر او په شخصي ډول په دې هوکړه وکړه. د اسنادو له مخې، سپوهر د مرستې په دود د یوه غیر چمتو حکومت لپاره لنډمهاله الوتنې کړې.
د جرمني د بهرنیو چارو وزارت د اټکل له مخې، د ۲۰۲۱ کال په اګست میاشت کې د تخلیې ټول لګښت شاوخوا ۱۹.۹ میلیونه یورو و. د رپوټ له مخې، په دې کې شاوخوا نیمایي لګښت د بوندس ویر مستقیمو الوتنو لپاره و چې له کابل څخه ترسره شوې، پاتې نیمایي یې د لوفتهانزا د ۱۷ چارټر الوتنو لپاره و. نور لګښتونه د ازبکستان هوايي شرکت د هغو الوتنو لپاره وو چې د تاشکند له لارې یې کړې وې.
د ازبکستان هوايي شرکت
اسناد ښيي چې د جرمني سفارت د ازبکستان دولتي هوايي شرکت ته لږ تر لږه ۱.۹ میلیونه یورو نغدې ورکړې دي.
شپیګل مجله لیکي چې د ژغورنې دا ګرانبیه الوتنې، چې ځینې یې څو چنده ګرانې وې، د دې لپاره اړینې وې چې د انګیلا مېرکل په مشرۍ مسیحي دیموکراټ ګوند کابل ته د طالبانو له ننوتلو وړاندې سم چمتووالی نه و درلود.
لوفتهانزا ویلي چې د ځانګړو الوتنو لپاره «ځانګړي احتیاطي تدابیر» نیول اړین وو.
