روسیې اوکراین تورن کړی دی چې په کرملین کې یې د ولسمشر ولادمیر پوتین په استوګنې د بې پیلوټه الوتکو (ډرونونو) برید کړی دی. کیف دا تور رد کړی دی
په ټولنیزو رسنیو کې یوه ویدیو چې تائید شوې نه ده، خپره شوې چې په کې ښودل کېږي د کرملین سنا په نوم ودانۍ د ګنبدې په سر چاودنه شوې ده، په دغې ودانۍ کې د روسیې د ولسمشر دفتر هم دی.
د دغه ادعا شوي برید دقیق هدف او په لاره اچوونکي لا مالوم نه دي.
مسکو کیف تورن کړی چې د یو پلان شوي تروریستي عمل په اساس یې غوښتل چې ولسمشر پوتین ووژني
رویټرز اژانس وايي چې د روسیې مخکني ولسمشر دمتري میدویدوف په خپلې ټولنیزې رسنۍ کې لیکلي دي چې په کرملین باندې د نیمې شپې د ډرون برید مسکو ته بله لار نه ده پرېښې پرتله له دې چې د اوکراین ولسمشر ولادمیر زیلینسکي او ډله یې خمته او له منځه يوسي.
نور ولولئ: د چین ولسمشر مسکو ته رسېدلی؛ نړیوالو ته څه پيغام لري
خو د اوکراین ولسمشر ولادمیر زیلینسکي دا خبره رد کړې ده چې ګنې هېواد به یې د دې کار مسئول وي. فرانس پرس د هغه له خولې لیکلي دي: “موږ په خپلې ځمکې کې جنګېږو او د خپلو کلیو او ښارونو څخه دفاع کوو.”
د اوکراین د ولسمشر ویاند میخایلو پودولیاک وايي چې دا د مسکو کار دی هغه وايي چې د روسیې له لوري داسې صحنه سازي شوي راپور ته باید په اوکراین باندې د روسیې له لوري پراخو بریدونو ته د تابیا نیولو د هڅې په سترګه وکتل شي.
نور ولولئ: د روسیې ولسمشر : مسکو په افغانستان کې د ثبات په راوستلو کې مرسته کوي
د واشنګټن پوست ورځپاڼې د راپور په اساس د امریکا د متحدو ایالتونو د بهرنیو چارو وزیر انتوني بلینکن د دغې ادعا په اړه شک ښودلی او ویلي دي چې دا مالومات تايیدولای نشي. انتوني بلینکن دا خبره هم کړې ده که اوکراین د روسیې په خاورې برید وکړي، متحده ایالتونه به یې ونه غندي او دا د اوکراینانو پرېکړه ده.
کرملین ویلي دي چې د روسیې پوځ او ځانګړو ځواکونو یې دا ډرونونه غیر فعال کړي او هرکله او هر چېرته یې چې مناسب وګاڼه، غچ اخیستل یې حق دی
سره له دې چې لا د دغه برید تنظيمونکي او په لاره اچوونکي څرګند نه دي، خو اوکراین د دې وړتیا لري چې په روسیې په خاورې کې لوی بریدونه وکړي او په تېر وخت کې یې هم دا کار کړی دی.