پاکستان پرېکړه کړې چې ناقانونه افغان کډوال تر ټاکلي مودې تر پوره کېدو وروسته له پاکستان څخه په زور وباسي

له پاکستانه د افغان کډوالو په زور د ایستلو د ضرب الاجل په نژدې کېدو سره، د سولې نوبل جایزې ګټونکې ملالې یوسفزۍ پر ټوېټر د کډوالو د جبري ایستلو په اړه د پاکستان پر پرېکړه نیوکه کړې او وايي چې “افغان کډوال- ماشومان، ښځې، سړي، بوډاګان- د طالبانو له ستمه تښتي، دوی د ملاتړ، عزت او خوندیتوب مستحق دي، نه د نورو موانعو او ځورونو”.

نور ولولئ: اصف منیر: موږ ته کډوال نه پاکستان مهم دی او داخله وزیر وايي، افغان کډوال خامخا باسي

ملالې پر ټوېټر لیکلي “زه د ملګرو ملتونو د کارپوهانو غږ بدرګه کوم او د پاکستان له حکومته غواړم چې د ډله‌ییز اخراج پر عجولانه سیاست له سره غور وکړي”.

پر اسلام اباد د ملګرو ملتونو فشار

ملګرو ملتونو او د کډوالو چارو ادارو پر پاکستان فشار راوړی و چې د افغان کډوالو جبري ستنولو پرېکړه بېرته واخلي، خو د پاکستان دلیل دا دی چې د یوه هېواد په توګه له خپلې خاورې د ناقانونه کډوالو د ایستلو حق لري.

د طالبانو حکومت د کډوالو رسېدنې ته لوړ رتبه کمېسیون جوړ کړی

د طالبانو حکومت وايي، د خپل مشرتابه په حکم یې له پاکستان او نورو هېوادونو په زور د ایستل کېدونکو افغانانو وضعیت ته د لا ښې رسېدنې لپاره یو عالي کمېسیون جوړ کړی دی.

نور ولولئ: اسلام اباد پر سیاسي ګوندونو غږ کړی چې د ناقانونه افغان کډوالو پر سره مه درېږئ

د طالبانو حکومت ویاند ذبیح الله مجاهد وايي، “د پاکستان حکومت د ټولو اصولو خلاف د افغان مهاجرینو د ایستلو پرېکړه وکړه، امیرالمؤمنین له پاکستان او نورو هېوادونو د جبري راستنېدونکو د وضعیت د حل لپاره د یوه عالي کمېسیون د جوړولو امر وکړ”.

کډوالو ته د طالبانو له لوري جوړ شوی کمیسیون

ښاغلی مجاهد زیاتوي چې دا کمېسیون چې د ریاست الوزراء د اداري مرستیال مولوي عبدالسلام حنفي په مشرۍ جوړ شوی، ۳۱ نور لوړپوړي چارواکي یې غړي دي د خپلو امکاناتو په حدودو به د لومړنیو خدمتونو وړاندې کولو کې برخه ولري.

د یاد کمېسیون لپاره یوه اداره او ۱۲ کمېټې منظورې شوې چې له موجوده امکاناتو په ګټه اخیستو د راستنېدونکو افغانانو د درملنې، تشخیص او لېږد او د استوګنې لپاره د زمینې برابرولو دنده لري.

ذبیح الله مجاهد وايي، چې د طالبانو حکومت د چمتو شوي تګلارې له مخې د سوداګرو او صنعتکارانو لپاره ځانګړې اسانتیاوې په پام کې نیولې دي.

نوموړی وايي، دوی د هغو هېوادوالو لپاره چې د ځینو اندېښنو له امله نورو هېوادونو ته تللي، ډاډ‌ ورکوي چې بې‌له کومې اندېښنې او وېرې خپل هېواد ته راستانه او په خپل هېواد کې په عزت ژوند وکړي.