ولسمشر غني په یو ورځني سفر بلخ ته تللی. داسې مهال چې په شمال کې یو شمېر ولایتونه د حکومت له ولکې وتلي دي، اشرف غني نن د یوه لوړپوړي پلاوي په ملتیا مزار شریف ته تللی.
ښايي نوموړی هلته له ځايي چارواکو سره د امنیتي وضعیت په اړه وغږېږي.له ارګ څخه په همدې تړاو خپره شوې خبرپاڼه کې راغلي، چې غني نن سهار د یوه لوړپوړي دولتي پلاوي په ملتیا مزار شریف تللی تر څو د شمالي ولایتونو امنیتي وضعیت وارزوي.
د خبرپاڼې له مخې غني به په دغه سفر کې د دې ولایت ملکي او نظامي مسوولینو، سياسي او جهادي مشرانو، قومي مشرانو او متنفذینو سره جلا جلا لیدنې ولري.او د دغه ولایت امنیتي تدابیرو باندې به خبرې وکړي.
دغه سفر داسې مهال دی، چې په شمال زون کې جوزجان، کندز، سرپل او بغلان ولایتونه د طالبانو لاس ته لوېدلي او یو شمېر نور شمالي ولایتونه تر کلکې محاصرې لاندې دي.
تېره ورځ مارشال رشید دوستم هم مزار شریف ته تللی او د یاد ولایت پخوانی والي «عطاء محمد نور» هم په بلخ کې دی.همداراز دولسمشر امنیتي اوسیاسي چارو کې ارشد سلاکار حاجي محقق هم دغه ولایت کې ولسمشر سره ملتیا کوي.
