بلوچستان کې څلورو ګوندونو هوکړه کړې چې د ټاکنو د پایلو پرضد به اعتراض کوي
په بلوچستان کې څلورو ګوندونو د فبرورۍ اتمې په ټولټاکنو کې د درغلۍ او د نتیجو بدلولو د تورونو پر اساس ګډ احتجاجي تحریک پیل کړی دی.
دا تر هغې وروسته ده چې د فبرورۍ پر ۱۰مه په کوټه کې د بلوچستان نیشنل پارټۍ (مېنګل)، نیشنل پارټۍ، پښتونخوا ملي عوامي ګوند او هزاره جمهوري ګوند (هزاره ډېموکریټېک پارټي) مشرانو او سیاستوالانو تر بیړنۍ غونډې وروسته وویل چې په شریکه احتجاجونه پیلوي او د پایلو ځنډولو لپاره عدالتونو ته ځي.
د بلوچستان نشنل پارټۍ ګواښ
د بلوچستان نیشنل پارټۍ (مېنګل) سیاستوال او پخواني سېنېټر ثنا بلوڅ تر غونډې وروسته پر اېکس په بیان کې ویلي ول چې څلورواړو ګوندونو دا پرېکړه هم کړې چې د بلوچستان اسمبلۍ ودانۍ محاصره کوي او د صوبې د “ولس د اصلي استازو” موازي (متوازي) اسمبلي جوړوي.
د هغو ګوندونو غړو او پلویانو تر خپل اعلان یوه ورځ وروسته د بلوچستان په مرکز کوټه کې د انتظامي مشر (ډېپټي کمېشنر) دفتر مخې ته پرلت وهلی دی.
نور ولولئ: په پاکستان کې د وسلهوالو بریدونو ډېرېدل؛ اسلام اباد له طالبانو غوښتي چې ترهګر وځپي
نور ولولئ: پاکستان کې د پارلماني ټاکنو لومړنۍ پایلې؛ عمران خان تر نورو مخکې دی
نور ولولئ: پاکستان کې د ټاکنو پایلې؛ هېڅ ګوند د قومي اسمبلۍ غوڅ اکثریت څوکۍ نه دي کټلي
په عین وخت کې د هزاره جمهوري ګوند مشرانو، غړو او ګڼو پلویانو، چې ښځې هم پکې شاملې وې، هم د فبرورۍ پر ۱۱مه د کوټې د خبریالانو مرکز مخې ته مظاهره وکړه.
د هغه ګوند یو مشر مرزا حسین مشال راډیو ته وویل چې په انتخاباتو کې ورسره ټګي شوې ده.
په چمن کې وهلی پرلت
د عوامي نیشنل ګوند غړو او پلویانو په چمن کې پرلت وهلی دی او د کوټې او چمن ترمینځ یې لویه لاره تړلې ده.
د فبرورۍ پر ۱۱مه په بوري (لورالايي) کې د پیپلز ګوند ښځینه پلویانو د انتظامي مشر دفتر مخې ته د مظاهرې پر مهال دعوه وکړه چې د دوی له نوماند شمس حمزه زي سره ټګي شوې ده.
د پاکستان انتخاباتي کمېشن لا د بلوچستان د څلورو ګوندونو د احتجاجي تحریک او د نورو ګوندونو د مظاهرو او دعوو په اړه څه نه دي ویلي خو د هغې خپلواکه ادارې مشر سکندر سلطان راجا د فبرورۍ پر اتمه ویلي ول چې انتخاباتي بهیر په بشپړه توګه “شفاف او منصفانه” وو.
کمېشن داراز وايي چې که څوک د پایلو په اړه شکایتونه لري نو عدالت ته دې ولاړ شي.
له دې پرته د پاکستان د کورنیو چارو لنډمهالي وزیر ګوهر اعجاز د فبرورۍ پر نهمه په اسلام اباد کې د خبري غونډې پر مهال د ټاکنو بهیر په اړه وویل چې که نګران وفاقي حکومت سم نیت نه لرلای نو د عامو انتخاباتو نتیجې به تر اوسنیو هغو بدلې وای.
