په رفح ښار د اسرائیلو تازه برید؛ طالبانو له نړیوالو غوښتي چې فلسطین کې د ټولوژنې مخه ونیسي
طالبانو پر رفح ښار د اسرائیلو برید ته غبرګون ښوولی او له نړیوالو یې غوښتي چې فلسطین کې د ټولوژنې مخه ډب کړي
طالبانود غزې پر رفح ښارګوټي د اسراییلو بریدونو ته غبرګون ښودلی او ویلي یې دي چې د اسراییلو دا ډول بریدونه به «بله لویه فاجعه رامنځته او روان ناورین به لا ژور کړي.»
طالبانو د بشري حقونو پر سازمانونو هم غږ کړی چې د اسراییلو د بریدونو مخه دې ونیسي.
د بلې لوی ناورین رامنځته کېدل
د طالبانو بهرنیو چارو وزارت د دوشنبې په ورځ د (سلواغي ۲۳مه) د یوې خبرپاڼې په خپرولو سره د غزې پر رفح ښارګوټي د اسراییلو بریدونو ته په غبرګون کې ویلي چې پر رفح ښارګوټي د اسراییلو د بریدونو دوام به «بله لویه فاجعه رامنځته کړي.»
طالبان له نړېوالو او سیمه ییزو دولتونو، اسلامي هېوادونو او د بشري حقونو له سازمانونو غوښتي چې په غزه کې د روانې ټولوژنې مخه ونیسي.
نور ولولئ: حماس-اسراییل جګړه: اسراییلیانو د فلسطیني کډوالو پر کمپ بمبارۍ کې ۷۰ کسان وژلي
نور ولولئ: د حماس-اسراییل جګړه؛ حماس د جګړې تر پای ته نه رسېدو پورې د یرغمل شوو کسانو د نه خوشي کېدو ګواښ کړی
نور ولولئ: د اسراییل او حماس تازه هوکړه؛ غزې او د اسرائیلو برمته شوو ته به مرسې ورسېږي
دوی د نړۍ له اغېزمنو هېوادونو غوښتي چې د فلسطین او اسراییلو تر منځ کشالې ته حل لاره ولټوي.
پر شته نړیوالو سازمانونو د شته باور ورکېدل
طالبانو په خپله دغه خپره شوې خبرپاڼه کې لیکلي؛ چې په غزه کې د ټولوژنې دوام به «حاکم نړېوال نظام او مدعي ارزښتونه یې له جدي پوښتونو سره مخ کړي او دا د پيړۍ ټولوژنه به د نړېوالو سازمانونو او بشري کنوانسیونونو شته باور له منځه یوسي.»
د راپورونو له مخې اسراییلو په رفح ښارګوټي کې هغه پنډغالی په نښه کړی دی چې د فلسطین ولسي وګړو په کې پناه اخیستي وه.
بل خوا یو شمېر رسنیو د حماس د یو جګپوړي مشر له قوله ویلي چي دا ډول بریدونه به د بندیانو د تبادلي روانې خبرې له له ګواښ سره مخ کړي.
له دې وړاندې اسرائیلو پر غزه برید کې ګڼو ملکي وګړو ته چې اکثریت یې ښځې او ماشومان دي، د سر او مال درانه زیانونه اړولي دي.
عربي او نور اسلامي هېوادونه تر اوسه نه دي توانېدلي چې ددغه لوی ناورین مخنیوی وکړي او لا هم لږ تر لږه ددې د روانې جګړې شدت راکم کړي.
د امریکا او نورو هېوادونو له لوري څو ځله هڅه وشوه چې په غزه کې د حماس او اسرائیلو تر منځ اوربند رامنځته کړي، خو تر اوسه د اوربند په رامنځته کولو هم نه دي توانېدلي.
