په ملګرو ملتونو کې د افغانستان استازیتوب طالبانو ته ورنه کړل شو
![un](https://afghannow.net/wp-content/uploads/2023/12/UN-348x196.png)
د ملګرو ملتونو دایمي غړو پرېکړه وکړه چې په ملګرو ملتونو کې د افغانستان د استازیتوب بحث وځنډوي
د ملګرو ملتونو عمومي غونډې د دغه سازمان د باور لیکونو د کمېټې پرېکړه تصویب کړې، چې د افغانستان د دایمي استازیتوب د څوکۍ په اړه پرېکړه وځنډول شي.
ملګري ملتونه وايي د باور لیکونو کمېټې په دغه سازمان کې د افغانستان د دایمي استازیتوب په اړه دوه جلا لیکونه ترلاسه کړي، چې یو یې د اګست په میاشت کې په ملګرو ملتونو کې د افغانستان د استازولۍ د شارژدافیر نصیر احمد فایق له لوري او بل یې د سپتمبر په میاشت کې د طالبانو حکومت د بهرنیو چارو وزارت له لوري دی.
نور ولولئ: په ملګرو ملتونو کې د افغانستان څوکۍ د تر لاسه کولو لپاره د افغان سرپرست حکومت ټینګار
د ملګرو ملتونو د عمومي غونډې په پرېکړې کې ویل شوي دي: «د غونډې ریاست وړاندیز کړی چې د باور لیکونو کمېټه دې د میانمار او افغانستان د باور لیکونو په اړه خپله ارزونه وځنډوي.»
ټاکل شوې ده چې نن دوشنبه ډسمبر ۱۸ (لیندۍ۲۷) د ملګرو ملتونو په عمومي مجمع کې دا پرېکړه د یو پرېکړه لیک له لارې تثبیته شي.
طالبانو ددې څوکۍ تر لاسه کولو ارمان درلود
د ۲۰۲۱ کال د اګست له میاشتې راهېسې، چې طالبان بیا واک ته ورسېدل، دا درېیم ځل دی چې ملګري ملتونه د افغانستان د دایمي استازیتوب د څوکۍ په اړه پرېکړه ځنډوي.
د طالبانو له بیا راتګ وروسته نصیر احمد فایق په ملګرو ملتونو کې د افغانستان د استازولۍ سرپرست دی او د افغانستان په استازیتوب د ملګرو ملتونو په غونډو کې برخه اخلي.
نور ولولئ: په ملګرو ملتونو کې د افغانستان استازي د افغانستان د بیا ادغام له پلان ملاتړ وکړ
د میانمار او افغانستان د استازیتوب په اړه د پرېکړې ځنډول په دې مانا دي چې د اړوندو هېوادونو موجوده استازي به په خپل حال پاتې وي.
د زور رسمیت که د قانون
نړیوالو ته په افغانستان کې یو مشروع او نړیوالو بشر حقونو ته ځواب ویونکی نظام مهم او مشروعیت لري. که چېرته طالبان د نړیوالو غوښتنې پوره نه کړي، نو فکر کېږي چې ژر دې په رسمیت وپېژندل شي او نړیوال دې ورسره همکاري وکړي.
ملګرو ملتونو د ۱۹۹۶ څخه تر ۲۰۰۱ کال پورې په افغانستان کې د طالبانو حکومت په رسمیت نه پېژنده او هغه وخت یې د برهان الدین رباني په مشرۍ حکومت، چې د افغانستان د جغرافیې په یوې کوچنۍ برخې حاکم و او د طالبانو په ضد یې مقاومت کاوه، د دغه هېواد د مشروع حکومت په توګه پېژنده.
د افغانستان د اسلامي جمهوریت له پرځېدو وروسته اوس هم ملګرو ملتونو کې د افغانستان نمایندګي د جمهوریت په نوم ده.