په ۱۶ ولایتونو کې د واورې او باران اټکل
![snow 1 780x470](https://afghannow.net/wp-content/uploads/2024/03/Snow-1-780x470-1.jpg)
د طالبانو تر کنټرول لاندې هوا پېژندنې ادارې د هېواد په ۱۶ولایتونو کې د واورې او باران اټکل کړی دی
دغه ادارې له خلکو غوښتي چې له سیلابونو سره له اختیاط کار واخلي.
د طالبانو د ټرانسپورټ او هوايي چلند وزارت د هوا پېژندنې ریاست د هېواد په ۱۶ ولایتونو کې د واورې، نسبتاً تیز باران، تالندې برېښنا او سېلابونو پېښېدو خبرداری ورکړی دی.
د بارانونو او واورې اندازه
نوموړي ریاست پنجشنبه د وري پر ۲مه په یوې خبرپاڼه کې لیکلي چې دا اټکل سبا (جمعه) د سالنګونو په ګډون په بدخشان، تخار، کندوز، بلخ، بغلان، پنجشېر، کاپیسا، لغمان، نورستان، پروان، سمنګان، بامیان، سرپل، جوزجان، فاریاب او غور ولایتونو کې شته.
د ورښت کچه په بېلابېلو سیمو کې له ۱۵ تر ۴۰ میلي مترو پورې ښودل شوی دی.
دغه راز، نوموړي ریاست د واورې کچه له ۱۵ تر ۴۰ سانتي مترو پورې اټکل کړې ده.
نور ولولئ: په افغانستان کې د درنې واورې اورېدو له امله ځینې لارې تړل شوي
نور ولولئ: دافغانستان د هوا پېژندنې اداره: په ۲۵ ولایتونو کې به درنه واوره وورېږي
نور ولولئ: د درنې واورې ورېدو او یخې څپې له امله د ۱۱۵۰۰ څارويو مړینه
په دې روستو کې د هېواد په ځینو سیمو کې د ورښتونو له کبله یو شمېر کسانو ته د سر او مال زیان اوښتی دی.
د تېرو واورو له کبله د ځینو لارو تړل کېدل او بیا پرانېستل
د ورښتونو روانه څپه د سالنګ، بامیان، غور او غزني کې د لویو لاریو د بندېدو لامل شوې وه. د کابل- کندهار لویه لار هم د څه وخت لپاره تړل شوې وه خو بېرته پرانېسته.
د طالبانو تر واک لاندې باخترخبري اژانس پر اېکس (ټوېټر) لیکلي و، “د سالنګ لویه لاره چې دوې ورځې وړاندې د واورو له امله د ترافیکو پر مخ تړل شوې وه، نن سهار بېرته خلاصه شوه. په ورته وخت کې د بامیانو د ټولګټو چارو ریاست ویلي چې د دغه ولایت د ولسوالیو لارې چې د ورښتونو له امله تړل شوې وې، بېرته پرانیستل شوې دي”.
اخوا په افغانستان کې د ژمي لومړنۍ دوې میاشتې (مرغومی او سلواغه) میاشتې نسبتاً د اورښت له مخې کمزوري وې او په ډېرو سیمو کې د وچکالۍ اټکل ډېر شوی و. خو د ژمي وروستۍ میاشت (کب) نسبتاً بیا باراني وه او اورښتونه په کې زیات اټل شوي دي.
د طالبانو تر کنټرول لاندې هوا پېژندنې اداره خبر ورکوي چې دغه میاشت په د افغانستان په اکثرو ولایتونو کې واورې او بارانونه کېږي.
مالدارانو او کرونګر بیا وايي چې که بارانونه ونه شي، نو دوی به راتلونکی کال له زیانونو سره مخامخ شي.