د چمن اوسېدونکي وايي، د سوېلي پښتونخوا له سیاسي ګوندونو زړه توري یو، طالبان دې زموږ غم وخوري
د چمن پرلتوال وايي، د نږدې یو کال پرلت وروسته لا هم د سپین بولدک – چمن پر دروازه د پاسپورټ او ویزې مسئله نه ده حل شوي او زموږ د سوداګرۍ پر وړاندې یې ستونزې جوړې کړي دي.
د چمن پرلتوال او ځايي اوسېدونکي یوځل بیا پر طالبانو غږ کوي، چې د سپین بولدک ـ چمن پر دروازه د پاسپورټ او ویزې د جبري کولو مسله دې حل کړي. د سوېلي پښتونخوا اوسېدونکي وايي، هلته ځايي سیاسي ګوندونه ناتوانه دي.
له طالبانو د مرستې غوښتل
د چمن د پرلت غړی حمیدالله وايي، پر افغانستان د طالبانو له واکمنېدو سره سم د سپین بولدک ـ چمن پر دروازه په پاسپورټ او ویزې تګ راتګ جبري شوی دی.
نوموړی وایي، په سوېلي پښتونخوا کې سیاسي ګوندونه ناتوانه او د پاکستان د حکومت تر فشار لاندې دي او طالبان باید د دوی ستونزې هوارې کړي.
نوموړی وايي:« دا دروازه د طالبانو د اوسني حکومت په راتګ سره تړل شوې ده؛ خو که د افغانستان اوسنی حکومت د خبرو له لارې د پاکستان له حکومت سره مذاکرات ونه کړي، زموږ پرلت هیڅ ګټه نه کوي، موږ له دربه دریو سره مخامخ یو.»
نور ولولئ: د چمن پرلت ۳۵ دېرشمه ورځ؛ اسلام اباد یې غوښتنو ته ځواب نه دی ویلی
نور ولولئ: د چمن پرلت وهونکي وايي چې د پاکستان حکومت ورسره په کړو ژمنو نه درېږي
نوموړی وايي، د چمن او سپین بولدک اوسېدونکي دې په ګډه یوه قومي جرګه جوړه کړي او د ډیورنډ کرښې دواړو لوریو ته د پرتو اوسېدونکو ستونزې دې د دواړو هېودونو له چارواکو سره حل کړي.
د چمن یو بل اوسېدونکی عصمت الله وايي، د تېر یو نیم کال راهیسې په دغه ښار کې کاروبار په ټپه درېدلی دی.
د بې روزګارۍ ډېرېدل
د نوموړي په خبره، د یاد ښار ډېر ځوانان د کار پیدا کولو په لټه د پاکستان نورو ښارونو ته تللي دي. په داسې حال کې چې وړاندې به د کار کولو لپاره د پاکستان له لرو پرتو سیمو څخه خلک دلته د کار کولو لپاره راتلل.
نوموړی وایي:« پر دروازه سوداګري محدوده شوې ده، د عامو خلکو تګ راتګ دواړو خواوو ته محدود شوی دی. ان جنازې وړل راوړل ستوتزمن شوي دي. ډېر کسان کراچۍ او اسلام اباد ته د کار کولو لپاره تللي دي او د پاکستان د حکومت همدا پلان دی، چې باید په دې سیمه کې کاروبار کم شي.»
دا لومړی ځل نه دی، چې د سوېلي پښتونخوا اوسېدونکي د سپین بولدک ـ چمن پر دروازه د پاسپورټ او ویزې د جبري شوي پرېکړې د حل په موخه پر طالبانو غږ کوي، تر دې وړاندې هم دغو پرلتوالو له طالبانو ورته غوښتنې کړې وې؛ خو طالبانو تر اوسه د دې مسلې په اړه هیڅ غبرګون نه دی ښودلی.
