ډونالډ ټرمپ: د پاکستان په مرسته مو د ۲۰۲۱ کال د کابل هوايي ډګر د ځانمرګي برید طراح نیولی
د امریکا ولسمشر ډونالډ ټرمپ تېره شپه واک ته له رسېدو وروسته په لومړي ځل د دغه هېواد کانګرس ته د وینا پر مهال ویلي، چې هېواد یې له افغانستان څخه د امریکا د وتلو پرمهال د کابل هوایي ډګر د مرګوني ځـانـمرګي برید طراح نیولی دی او د دغې برید عامل امریکا ته د لېږد په حال کې دی.
د وال سټریټ ژورنال د راپور له مخې، ټرمپ تېره شپه(سهشنبه، د کب ۱۴مه) پخپلو خبرو کې له افغانستانه وتل له «شرمه ډک» وبلل او زیاته یې کړه چې دا د امریکا په تاریخ کې «شرموونکې» شېبه وه. ټرمپ د داعش د هغه غړي د نیول کېدو او په امریکا کې د محاکمه کېدو په اړه هم یادونه وکړه چې له افغانستانه د وتلو پر مهال یې د کابل هوايي ډګر په برید کې لاس و چې له امله یې ۱۳ امریکايي ځواکونه و وژل شول.
متحده ایالاتو د پاکستان په همکارۍ د ۲۰۲۱ کال د اګست په مرګوني برید کې ښکېل یو ترهګر نیولی دی. اکسیوس دا کس د «محمد شریفالله» په نوم یاد کړ او ویې ویل چې پاکستان په دې وروستیو کې هغه د سيایاې د معلوماتو پر بنسټ نیولی، او وال سټریټ ژورنال هغه یو افغان وسلهوال بللی دی.
وال سټریټ ژورنال محمد شریفالله د داعش خراسان ډلې غړی بللی چې د اګست ۲۰۲۱ کال د کابل په هوايي ډګر کې د مرګوني ځانمرګي برید په تنظیمولو کې یې لاس درلود. په دې مرګوني برید کې د کابل نړیوال هوايي ډګر څخه د تخلیې د عملیاتو په جریان کې ۱۳ امریکایي سرتیري او څه باندې ۱۷۰ ملکي وګړي ووژل شول.
دا پیښه په افغانستان کې د امریکا د پوځي شتون په وروستیو پړاوونو کې یو له خونړیو بریدونو څخه ګڼل کیږي. د داعش ډلې د برید له پېښې یوه ورځ وروسته د دې برید مسوولیت په غاړه واخیست، او ادعا یې وکړه چې د «عبدالرحمن لوګري» په نوم یو کس له امنیتي خنډونو تېر شوی و، امریکایي ځواکونو ته نږدې شوی و او ځانمرګی برید یې ترسره کړی و.
