کابل کې ښاري بسونو ته د جي پي ایس (GPS) سیسټم د نصب لړۍ پیل شوه

کابل کې ښاري بسونو ته د GPS سیسټم د نصب لړۍ پیل شوې ده. په لومړي پړاو کې ۵۰ بسونه په دې سیسټم سمبال شوي او نورو بسونو ته یې هم د غځولو پلان شته.
د امارتي شرکتونو عمومي ریاست په کابل ښار کې د ښاري بسونو د فعالیتونو د ښه مدیریت او څارنې لپاره د GPS سیسټم د نصبولو لړۍ پیل کړې ده.
د موقعیت موندنې نوي هڅې
د دغه ریاست د معلوماتو له مخې، کابل کې ښاري بسونو ته د موقعیت موندنې د دې سیسټم په نصبولو سره به د بسونو تګ راتګ او ټاکل شوي مسیرونه په دقیق ډول څارل کېږي.
د امارتي شرکتونو عمومي ریاست ویاند مولوي محمد نبي بهار ویلي، د پروګرام په لومړي پړاو کې د ملي بس امارتي شرکت اړوند د لومړۍ حوزې ۵۰ بسونه په دې سیسټم سمبال شوي دي.
کابل کې ښاري بسونو ته د GPS سیسټم د نصب موخه څه ده؟
د محمد نبي بهار په وینا، د نوي سیسټم له فعالېدو سره به د بسونو د موقعیت معلومول او د هغوی د تګ راتګ څارنه اسانه شي.
نوموړي ویلي، د دې ټکنالوژۍ په مرسته به د ټرانسپورټي فعالیتونو مدیریت هم ښه شي.
د GPS سیسټم د بسونو د موقعیت او مسیرونو د معلومولو لپاره کارول کېږي او د ترانسپورټي چارو له مسؤلینو سره د فعالیتونو په څارنه کې مرسته کوي.
د چارواکو په وینا، کابل کې ښاري بسونو ته د دې سیسټم نصب د عامه ترانسپورټ د مدیریت د ښه کولو لپاره پیل شوی دی.



