د کار او ټولنیزو چارو وزارت په پکتیا کې ۴۰ ځوانانو ته د ۳۰۰ زره افغانیو په ارزښت کاري وسایل ووېشل، ترڅو هغوی وکولی شي خپل کوچني کاروبارونه پیل او بېکاري ختمه کړي.
د افغانستان د اسلامي امارت د کار او ټولنیزو چارو وزارت خبر ورکړی چې په پکتیا ولایت کې د بېکارۍ د کچې د راټیټولو او د ځوانانو د ملاتړ په موخه یې یو شمېر کسانو ته مسلکي کاري وسایل چمتو کړي دي. د دغه وزارت په وینا، دا اقدام د ځوانانو د اقتصادي پیاوړتیا او په ټولنه کې د هغوی د فعالې ونډې لپاره شوی دی.
کاري وسایل، د پروژې جزیات او لګښت
د پکتیا ولایت د کار او ټولنیزو چارو ریاست په هڅو او همغږۍ، ۴۰ ځوانانو ته د ۳۰۰ زره افغانیو په ټولیز ارزښت بېلابېل کاري وسایل سپارل شوي دي. دغه ځوانان تر دې وړاندې په خپلو اړوندو حرفو کې روزل شوي وو او اوس ورته د عملي کار پیلولو لپاره ټول اړین امکانات برابر شوي دي.
دا ډول ملاتړیزې پروژې په لیرې پرتو ولایتونو کې د ځوانانو د هڅونې او د مهاجرتونو د مخنیوي لپاره خورا ګټورې ثابتېدای شي.
کاري وسایل، حرفوي زدهکړې او کاري بوختیاوې
د وزارت په خبرپاڼه کې راغلي چې دغه ۴۰ ځوانان د ودانیزې برېښنا او د موټرسایکل ترمیم په برخو کې مسلکي زدهکړې کړې دي. د دوی د زدهکړو تر بشپړېدو وروسته، حکومت ورته د هغو حرفو اړوند کاري وسایل ورکړل چې دوی پکې مهارت لري.
د کار او ټولنیزو چارو وزارت په هېواد کې د بېکارۍ د له منځه وړلو لپاره د یوې منظمې ستراتیژۍ له مخې کار کوي. دوی هڅه کوي چې هېوادوالو ته نه یوازې زدهکړې ورکړي، بلکې د کاري وسایل په برابرولو سره هغوی ته په مستقیم ډول د کار زمینه هم برابره کړي.
د حلالې نفقې موندل او د مسوولینو غوښتنه
د وزارت مسوولینو له هغو کسانو چې دا کاري وسایل یې ترلاسه کړي، وغوښتل چې له دغو امکاناتو څخه په سمه توګه ګټه پورته کړي. هغوی ټینګار وکړ چې ځوانان باید له دې لارې خپلو کورنیو ته حلاله نفقه پیدا کړي او د هېواد په ابادۍ کې برخه واخلي.
د یادونې وړ ده چې د اسلامي امارت د کار او ټولنیزو چارو وزارت تر دې وړاندې هم په کابل او نورو ولایتونو کې له زرګونو ځوانانو سره د حرفوي زدهکړو او د کاري وسایل د وېش په برخه کې ورته مرستې کړې وې او دا لړۍ لا هم دوام لري.
په پکتیا کې د کاري وسایل وېشل یو مثبت ګام دی چې ځوانانو ته د ځان بسیاینې فرصت ورکوي. که چېرې دا ډول مرستې په شفافه او دوامداره توګه ترسره شي، نو په هېواد کې به د حرفوي کارګرو شمېر زیات او د بېکارۍ کچه به په محسوسه توګه راکمه شي.
