د هند پلازمېنې ډیلي په ګډون یو شمېر لویو ښارونو کې د کووېډ نویو ناروغانو شمېر له ډېرېدو سره دغه هېواد کې د کورونا درېیمې څپې خپرېدو وېره څرګندېږي. هندي روغتیا پوهان وايي، پر چهار شنبه د ۵۸ زره ۹۷ نویو ناروغانو نومونه ثبت شوي دي، چې د تېرې اونۍ پرتله شپږ برابره زیات شمېر دی.
ماهرین د دې زیاتولي لامل د کورونا وېروس نوې بڼه اومېکرون بولي.
د ټولو نویو ناروغانو له دریو یوه برخه یې یوازې په ډیلي او ممبۍ ښارونو کې ثبت شوي دي.
نور یی ولوله | طالبان وايی چې پر ډیورنډ لیکې رامنځته شوې جنجال له دیپلوماتیکو لارو حل کوو
دواړو ښارونو کې د ګرځبندیز په ګډون سخت اقدامات شوي، چې د وېروس خپرېدو مخه ونیول شي. په هند کې د واکسینو ورکړې چارو مسوول این کي اروړا این ډي ټي وي خبري شبکې ته پر دوشنبه وویل، د کورونا وبا درېیمه څپه وار له مخه په هېواد کې پیل شوې ده.
د نوموړي په خبره: ”د دې نوې څپې تر شا نوې بڼه… اومېکرون ده. ”
په هند کې د اومېکرون بڼې نویو ناروغانو شمېر ۲۰۰۰ کسانو ته رسېدلی، چې تر ټولو ډېر شمېر (۶۵۳ کسان) یې په مهاراشټر ایالت کې دی، چې ممبۍ یې مرکزي ښار دی او دویم ځای کې پلازمېنه ډیلی دی، چې د ناروغانو شمېر یې ۴۶۴ کسانو ته رسېږي. د ډیلي عامې روغتیا وزیر ستیندر جېن وايي، پلازمېنه کې معاینه شوي ۸۱ سلنه نوي ناروغان پر همدې اومېکرون بڼه اخته دي.
