په افغانستان کې د دالمعلمینونو استادان د طالبانو پرېکړه ناعادلانه بولي
د هېواد په بېلابېلو ولایتونو کې یوشمېر استادان د ښوونکو د روزنې بنسټونو د لغوه کولو پرېکړې په غبرګون کې وايي، دغه بنسټونه اغېزناک دي او باید د پوهنې وزارت له چوکاټ څخه ونه اېستل شي.
د سیدجمالالدین افغان انسټېټیوټ د ښوونکو د روزنې استاد نوید (مستعار نوم) وايي چې دا پرېکړه به د هېواد پوهنیز سکټور ته سخت زیان واړوي.
هغه زیاتوي: «ښوونکي مسلکي پرمختګ او وړتیا لوړونې ته اړتیا لري او مسوولیت یې په مستقیم ډول دغو بنسټونو ته ورګرځي چې د ښوونکو وړتیا لوړه کړي. کله چې دغه بنسټونه لغوه شي، د پوهنې سکټور ته زیان رسېږي او موږ به په راتلونکي کې منجمده پوهنه ولرو.»
د ګڼ شمېر استادانو بې کاره کېدنه
په سرپل کې یو استاد شعیب (مستعار نوم) بیا د پوهنې وزارت له مسوولانو غواړي چې د ښوونکو د روزنې بنسټونو د لغوې یا یې هم د کار د بدلون په اړه پر خپلې پرېکړې بیاکتنه وکړي. د نوموړي په وینا، د ښوونکو د روزنې بنسټونو په لغوه کېدو سره نه یوازې ستونزې نه حلېږي، بلکې د دغو بنسټونو ګڼشمېر استادان او کارکوونکي هم وزګاره کېږي.
په همدې حال کې د پوهنې وزارت په یوه خبرپاڼه کې ویلي چې د ریاستالوزرا د تشکیلاتو او تنخواوو کمېسیون تازه پرېکړه کړې، څو د دغه وزارت له تشکیل څخه موازي او بېګټې بنسټونه لرې کړي.
استادان وايي دغه بنسټونه بې ګټې نه دي
خو استادان بیا د دغو بنسټونو بېګټې او موازي ګڼل نه مني. په پنجشېر کې د ښوونکو د روزنې یو استاد پروېز (مستعار نوم) وايي، دارالمعلمینونه د ښوونې او روزنې اصلي ستنې دي او هغه باید موازي او بېګټې ونه بلل شي. د هغه په خبره، غوره به وي چې په دې اړه د متخصصانو او کارپوهانو نظرونه واخیستل شي، څو د دغو بنسټونو ګټورتیا او ارزښت روښانه شي.
نور ولولئ: د افغان نجونو زده کړې؛ د م.م د سرمنشي استازی د ښوونځیو پرانیستو غوښتنه وکړه
بلهخوا د ښوونې او روزنې کارپوهان د زدهکړو کیفیت لوړوالي او د استادانو، په تېره د ولایتونو استادانو د وړتیا لوړونې برخه کې د ښوونکو د روزنې بنسټونو فعالیت اغېزناک بولي.
د ښوونې او روزنې کارپوه شفیقالله سادات وايي: «دغه بنسټونه د ښوونکو د وړتیا لوړونې لپاره ډېر ګټور دي. ځینې ښوونکي په ولایتونو کې هم تدریس کوي او خپله هم یو څه زده کوي، څو یې د کار کیفیت لوړ شي. له بل اړخه، هغوی چې د قلم خاوندان وو، له دې لارې به یې تنخوا ترلاسه کوله.»
