عطا محمد نور د پکتیکا پر وحشي برید چوپه خوله، خو پر قاسم سلیماني خواشیني څرګندوي

د بلخ پخواني والي عطا محمد نور د پکتیکا پر ویر چوپه خوله، خو د ایراني جنرال قاسم سلیماني د ۵ تلین د رارسېدو له امله یې خواشيني څرګنده کړې ده.

نوموړي په خپل اېکس کې لیکلي، چې د سلیماني مړینه د ایران او د اسلامي نړۍ لپاره نه جبرانېدونکې ضایعه ده.

د هغه دغه پیغام تر هغه وروسته له پراخو غبرګونونو سره مخ شو، چې څو ورځې وړاندې پاکستاني پوځیان د پکتیکا ولایت په برمل ولسوالۍ د برید په ترڅ کې لسګونو ملکي کسانو ته مرګژوبله واړوله او عطا محمد نور پرې هېڅ ډول غبرګون و نه ښوده.

پر عطا محمد نور نیوکې

نیوکه کوونکو ښاغلی نور پردي پاله کس بللی او وایي، چې د افغانستان مسایلو ته په قومي او سمتي سترګه ګوري.

نور په خپل پیغام کې قاسم سلیماني ته د شهید کلمه کارولې او ویلي یې دي: «په ډیرې خواشینۍ سره د زړونو د سردار او د مقاومت د بنسټګر حاجي قاسم سلیماني د شهادت د پنځم تلین په مناسبت د ایران مشرتابه او ستر ملت او د هغه کورنۍ ته د تسلیت مراتب وړاندې کوم.»

نور ولولئ: پر پکتیکا او خوست د پاکستان هوايي بریدونه؛ د وژل شوو ۱۸ ته ورسېده

نور ولولئ:  پاکستان کې د ناامنۍ اوج؛ تازه د پولیسو پر یوه مرکز برید شوی

عطا محمد نور پر افغانستان د شوروي اتحاد د یرغل پر مهال وسله وال جهاد ته ودانګل، خو د هغه وخت په انځورونو او ویډیوګانو کې لیدل کېږي چې د پاکستان د پخواني دکتاتور ضیاءالحق انځورونه په خپل دفتر کې مېخ کوي. ښاغلی نور د هغه وخت مجاهدینو له قومندانانو څخه و چې د پاکستاني واکمن ضیاءالحق پر وژل کېدو یې غوايي خیرات او هغه ته یې دعاګانې وکړې.

پر عطامحمد نیوکه کوونکي وايي چې پر نوموړي د هېواد هر ټوټه او هر وګړی حق لري چې د ستونزو او غم پر وخت یې غږ پورته کړي.

پر پکتیکا د پاکستان د پوځ بمبار

پر پکتیکا د پاکستاني پوځ هوايي بریدونه چې قرباني یې ښځې، ماشومان او بې ګناه کسان وو، د افغانستان د اکثره سیاسیونو لخوا وغندل شول، خو د احمد مسعود تر مشرۍ لاندې د مقاومت جبهې د پاکستان په ملاتړ اعلامیه خپره کړه او عطا محمد نور چوپ پاتې شو.

له سیمې راپورونه وايي، چې طالبانو د ډیورنډ فرضي کرښې ته نږدې د پاکستاني پوځ پر پوستو تر ټولو سخت بریدونه وکړل.

طالبانو د شنبې په ورځ د غیر رسمي سرچینو له مخې وویل چې په دې بریدونو کې ۱۹ پاکستاني پوځیان هلاک شوي دي، خو پاکستان تر اوسه په دې اړه څه نه دي ویلي.