پر افغانستان واکمن حکومت د پنجشنبې په ورځ تایید کړه چې له پاکستاني چارواکو سره د استانبول څو ورځنۍ خبرې پای ته رسېدلې دي، او دواړو لورو منلې ده چې “یو ځل بیا به سره وویني او د پاتې موضوعاتو په اړه به بحث وکړي.”
د افغانستان د طالبانو د حکومت ویندوی ذبیحالله مجاهد په یوه اعلامیه کې وویل چې دا خبرې “د دوو وروڼو هېوادونو، ترکیې او قطر د غوښتنې او منځګړیتوب” له مخې ترسره شوې، او ټینګار یې وکړ چې د افغانستان اسلامي امارت لا هم ډیپلوماسي د ستونزو د حل غوره لاره ګڼي.
هغه زیاته کړه:
“د خپلې دایمي او اصولي تګلارې له مخې چې ټول مسائل باید د ډیپلوماسۍ او تفاهم له لارې حل شي، د افغانستان اسلامي امارت له پاکستاني لوري سره په استانبول کې څو ورځې خبرې وکړې.”
په ترکیه کې د پاکستان اسلامي جمهوریت سره د مذاکراتو په اړه د افغانستان اسلامي امارت د ویاند څرګندونې
د افغانستان اسلامي امارت د خپل دایمی اصولي دريځ په رڼا کې، چې د ډيپلوماسۍ او تفاهم له لارې د ستونزو حل غواړی ، پاکستاني لوري سره د ترکيې او قطر د وروڼو دولتونو په غوښتنه
په همدې حال کې د ترکیې دولتي تلویزیون ټي آر ټي د خپل هیواد د باندنیو چارو وزارت پر اساس راپور ورکړ چې د دواړو خواوو ترمنځ به بل پړاو خبرې د راروان نوومبر په ۶ مه کېږي او تر هغه مهاله به دواړه خواوې اوربند رعایتوي.
وزارت د پنجشنبې په ورځ په یوه اعلامیه کې وویل:
“ټول اړخونه د اوربند د دوام په اړه سلا شوي دي. د موافقې د عملي کولو طریقې به د ۲۰۲۵ کال د نوومبر په ۶مه نېټه په استانبول کې د یوې لوړې کچې غونډې پر مهال وڅېړل شي او پرې به پرېکړه وشي.”
مجاهد له انقرې او دوحې څخه د دې خبرو د اسانتیا د برابرولو په خاطر مننه وکړه.
د مجاهد دا څرګندونې وروسته له هغې خپرې شوې چې د دواړو هېوادونو استازو څلور ورځې د تړلو دروازو تر شا خبرې وکړې — دا خبرې د کابل او اسلاماباد ترمنځ د زیاتېدونکي کړکېچ د کمولو په موخه ترسره شوې وې. دواړو لورو د ډیورند کرښې په اوږدو کې د امنیت، د پاکستاني طالبانو د تحریک (TTP) د حضور، او د پاکستان لهخوا د افغانانو د ډلهییز اخراج په اړه خبرې وکړې.
د طالبانو له لوري پنځه کسیزه پلاوي، چې په مشرۍ یې د کورنیو چارو وزارت مرستیال رحمتالله نجیب کاوه، ګډون کړی و.
مجاهد وویل، طالبان دې خبرو ته په بشپړ صداقت او مسؤلیت ورغلي وو:
“اسلامي امارت د خبرو اترو بهیر په اخلاص او جديت پیل کړ… او دې بهیر ته یې په بشپړه همکارۍ او زغم دوام ورکړ.”
که څه هم کومه مهمه لاسته راوړنه اعلان نه شوه، خو دواړو لورو منلې چې د پاتې مسایلو د حل لپاره به راپه بله غونډه کې سره کښېني. مجاهد د “ناحل شویو موضوعاتو” جزییات څرګند نه کړل.
طالبانو په خپله اعلامیه کې دا هم وویل چې له اسلاماباد سره د “ثابتو او متوازنو” اړیکو د ساتلو هڅه کوي، سره له دې چې په وروستیو اوونیو کې اړیکې ترینګلې شوې دي.
مجاهد وویل:
“لکه څنګه چې اسلامي امارت له نورو ګاونډیو هېوادونو سره ښې اړیکې غواړي، له پاکستان سره هم د متقابل احترام، د نه لاسوهنې او د نهګواښ پر بنسټ اړیکې غواړي او ورته ژمن دی.”
که څه هم د استانبول خبرې پرته له عملي پایلې پای ته ورسېدې، خو ډیپلوماټان وایي دا خبرې په خپله د اړیکو په ښه والي کې یو مثبت ګام دی، ځکه تر دې وړاندې دواړه هېوادونه د بشپړې جګړې تر پولې رسېدلي وو.
مجاهد د استانبول غونډه “یو پېچلی بهیر” وباله، خو ویې ویل چې پایله یې د دوامدارو خبرو لپاره زمینه برابروي:
“د استانبول خبرې له دې موافقې سره پای ته ورسېدې چې دواړه لوري به بیا سره وویني او د پاتې موضوعاتو په اړه به بحث وکړي.”
