اسراییل وايي، په جنین کې د ایران له نیابتي وسله والو سره جګړه کوو
![b5530c2b718b614f5b8090ef6591ca41086fdb2c 1920x1280](https://afghannow.net/wp-content/uploads/2023/07/b5530c2b718b614f5b8090ef6591ca41086fdb2c-1920x1280-1-348x196.jpg)
اسراییل ادعا کوي چې په جنین کې د ایران له نیابتي وسلهوالو سره په جګړه کې ښکېل دي
د جنین په دغو پوځي عملیاتو کې د اسراییلو سلګونو ځواکونو برخه اخیستې چې په ډرون او نورو نظامي تجهیزاتو تجهیز دي.
خبري سرچینې د اردن سیند د لوېدیزه غاړې په جنین ښار کې د اسراییلي ځواکونو او فلسطیني وسله والو ترمنځ د سختو وسله والو نښتو د دوام خبر ورکوي.
دا نښتې د دوشنبې سهار وختې تر هغې وروسته پیل شوې چې اسراییلي ځواکونو لومړی په جنین کې هوايي بریدونه او بیا ځمکني عملیات پیل کړل.
د لوېدیزې غاړې په جنین پنډغالي کې شاوخوا ۱۸ زره فلسطینیان اوسي.
د عملیاتو دوام، مرګ او ژوبله
د اسراییل د پوځ ویاند ویلي چې دغه عملیات ښايي ورځ دوه دوام وکړي.
په دغو عملیاتو کې تر دې دمه د ۹ کسانو د وژل کېدو او شاوخوا ۱۰۰ نورو د ټپي کېدو خبر ور شوی دی.
اسراییل دا د ترهګرۍ ضد عملیات بولي او وايي د وسله والو ترهګرو تاسیسات پکې په نښه کوي.
نور ولولئ: اسراییل وایي، د لوېدیزې غاړې جنین پنډغالي کې یې پوځي عملیات پیل کړي
خو فلسطینیان وايي اسراییلي ځواکونو د ملکي استوګنې پر سیمو بریدونه او جنګي جنایت ترسره کړی دی.
د ملګرو ملتونو سرمنشي انتونیو ګوتېرېش جنین پنډغالي کې د دغو پوځي عملیاتو په اړه ژوره اندېښنه ښودلې ده.
هغه یوه اعلامیه کې غوښتنه کړې چې د دغو عملیاتو پر مهال دې نړیوال بشري حقونه په بشپړ ډول پام کې وساتل شي.
د ښاغلي ګوتېرېش یوه ویاند هم په جنین کې د اسراییلو هوايي بریدونو ته په اشارې ویلي، چې په ګڼ مېشتو سیمو کې وسله وال بریدونه د منلو نه دي.
امریکا وايي چې اسراییل له ځان دفاع کوي
د امریکا متحدو ایالتونو که څه هم ویلي چې اسراییل د خپلو خلکو د دفاع حق لري، خو دا غوښتنه یې هم کړې چې د ملکي فلسطینیانو د ژوند خوندیتوب ته دې پام وشي.
د امریکا بهرنیو چارو وزارت یوه ویاند دوشنبه جنین کې د اسراییلي ځواکونو دغو بریدونو ته غبرګون کې وویل “موږ د اسراییل د امنیت او دغه هېواد لخوا د فلسطین اسلامي جهاد او حماس پر وړاندې د خپلو خلکو د دفاع حق ملاتړ کوو.”
اسراییلي ځواکونو جنین کې دغه پوځي عملیات داسې مهال پیل کړي چې د لوېدیزې غاړې د شمال په دغه ښار د بېلابېلو فلسطیني ډلو او پوځي تشکیلاتو د اړوندو وسله والو یو نوی نسل په راټوکېدو دی.