اسلام اباد او واشنګټن د ټي ټي پي او داعش په اړه خبرې کړي دي
د دواړو هېوادونو بهرنیو چارو وزیرانو د ترهګرو ډلو په ځانګړي توګه ټي ټي پي او داعش د ځپلو او پر وړاندې یې پر مبارزه خبرې کړي دي.
د پاکستان د بهرنیو چارو وزارت له امریکا متحدو ایالتونو سره د تحریک طالبان پاکستان او داعش خراسان ډلو خلاف د مبارزې په اړه د خبرو خبر ورکړی.
دغه وزارت په یوه اعلامیه کې ویلي، پاکستان او امریکا په دې باور دي چې د ټي ټي پي، داعش خراسان او نورو ترهګرو ډلو سره ګډه مبارزه به په سیمه کې امنیت راولي او له بهر د ترهګرۍ ګواښونه به له منځه یوسي.
د پاکستانيو چارواکو ادعا
د پاکستان د بهرنیو چارو وزارت د معلوماتو له مخې، یادې خبرې د ملګرو ملتونو او اسلامي همکاریو سازمان په چارو کې د پاکستان د بهرنیو چارو وزارت مرستیال سید حیدر شاه او د امریکا د بهرنیو چارو وزارت د ترهګرۍ ضد د هڅو همغږې کوونکې الیزابت ریچارد ترمنځ اسلام اباد ته د ریچارد د سفر پر مهال شوې دي.
نور ولولئ: د پاکستان پوج: کراچۍ کې مو د ټي ټي پي خطرناکه اوولس کسیز ګروپ نیولی
نور ولولئ: اسلام اباد له طالبانو د ټي ټي پي د له منځه وړلو غوښتنه وکړه
پاکستاني چارواکو یو ځل بیا ادعا کړې، چې هېواد یې له اوږدو کلونو راهیسې د ترهګرۍ قرباني دی او په دې برخه کې د نړیوالو په تېره بیا امریکا همکاریو ته اړتیا لري.
د پاکستان د بهرنیو چارو وزارت منلې چې د ترهګرۍ ضد مبارزو په اړه د امریکا او پاکستان تر منځ د ورته ناستو له تېرې دورې چې د ۲۰۲۳ کال په مارچ کې ترسره شوې تر دې دمه امریکا د پاکستان ۳۰۰ امنیتي ځواکونه روزلي او مرستې یې ورسره کړي.
د پاکستا شکایتونه
پاکستان همداراز له ترهګرۍ سره د مبارزې به برخه کې د ظرفیتونو په لوړولو، د تجربو د تبادلې او د پلټنو د تګلارو د عملي کولو په مسلې ټينګار لري.
امریکایی لوري په دې تړاو څه نه دي ویلي.
پاکستان په وروستیو کې پر افغانستان د طالبانو له واکمن رژیم څخه بیا- بیا شکایت کړی چې ګواکې د افغانستان خاوره یې د دوی خلاف د ټي ټي پي ډلې د استفادې لپاره پریښی.
طالب چارواکو دا ادعا رد کړې او برعکس یې ادعا کړې، چې پاکستان د افغانستان خلاف د داعش له خراسان څانګې سره مرسته کوي.
دا راپور داسې مهال خپرېږي چې تېر ماښام په پکتیا ولایت کې د پاکستان او طالبانو تر منځ یو ساعته نښته هم شوي ده.
