د پاکستان د بهرنیو چارو وزارت ویلي، له ټي ټي پي وسله والو سره خبرې نه کوو
هاخوا تحریک طالبان پاکستان پر پاکستاني پوځ خپل بریدونه زیات کړي دي او پاکستاني پوځ د عزم استحکام پلان شوو عملیاتو لپاره یې هم تیاری نیولی دی.
تېر کال افغان طالبانو هڅه وکړه چې د ټي ټي پي مشران له اسلام اباد سره خبرو ته کینوي، خو هغه وخت هم پاکستان دغه وړاندیز رد کړ او د طالبانو د بهرنیو چارو وزیر امیرخان متقي د پاکستان دغه پرېکړه یوه لویه تېروتنه یاده کړه.
د پاکستان د بهرنیو چارو ویانده زهرا بلوچ
د پاکستان د بهرنیو چارو وزارت ویاندې ممتاز زهرا بلوچ له تحریک طالبان پاکستان یا ټي ټي پي سره د دوی د حکومت د سولې په اړه د افغانستان د واکمن رژیم غوښتنه رد کړې.
نوموړې په یوه خبري ناسته کې ویلي، چې دوی له ټي ټي پي سره د خبرو کوم پلان نه لري.
دا خبره داسې مهال شوې، چې تازه پاکستاني رسنیو افغانستان ته د پاکستان د بهرنیو چارو وزیر اسحاق ډار د سفر اعلان کړی.
نور ولولئ: اسلام اباد له طالبانو د ټي ټي پي د له منځه وړلو غوښتنه وکړه
نور ولولئ: د پاکستان پوج: کراچۍ کې مو د ټي ټي پي خطرناکه اوولس کسیز ګروپ نیولی
د دغه سفر نېټه تراوسه مشخصه نه ده، خو ګومان کیږي چې یو مهم بحث او هدف به یې په افغانستان کې د ټي ټي پی د ادعا شوي حضور په اړه طالب چارواکو سره خبرې وي.
له افغانستانه د ټي ټي پي غړو پر ایستلو ټینګار
ډار څو ورځې مخکې وویل، چې د کابل رژیم له چارواکو یې غوښتي چې د ده په وینا افغانستان نه د ټي ټي پي غړي وباسي.
د طالبانو رژیم د نوموړي څرګندونو او دغه راز د هغه د ویاندې تازه خبرو ته غبرګون نه دی ښودلی.
د طالبانو له بیا واک ته رسېدو سره کابل د اسلام اباد او ټي ټي پي د خبرو کوربه و، خو دا خبرې ظاهراً بې پایلې وې.
اسلام اباد د کابل طالب واکمنان د ټي ټي پي په ملاتړ او ورته په پناه ورکولو تورنوي، خو د کابل واکمنان دا تورونه بې اساسه ګڼي.
هاخوا د پاکستان پر پوځ او امنیتي ادارو د تحریک طالبان پاکستان له لوري مرګوني ګزارونه روان دي او په دغه بریدونو کې زیاتوالی راغلی دی.
د ټي ټي پي په بریدونو کې زیاتوالی او د پرمختللو وسلو تر لاسه کولو د اسلام اباد اداره او پوځ وارخطا کړي دي، ځکه هره ورځ یې حالات له واکه وځي.
