اسلام اباد ټاپي پروژه مهمه بللې، او پر ژر پیل یې ټینګار کړی
![tapi](https://afghannow.net/wp-content/uploads/2023/12/TAPI-780x470.jpg)
اسلام اباد وايي چې ټاپي پروژه اړینه ده او بې له کوم ځنډه یې باید د عملي کولو کارونه پیل شي
د ټاپي پروژه هغه پروژه چې د منځنۍ اسیا پر انرژۍ سمبال هېوادونه د د ترکمنستان او افغانستان له لارې له پاکستان او هند سره نښلوي. دغه پروژه د ترکمنستان، افغانستان، پاکستان او هند څلور واړه هېوادونو لپاره یوه حیاتي پروژه بلل کېږي.
د پاکستان لوړپوړي اقتصادي فورم د پنجشنبې په ورځ د لوړې کچې مشورتي غونډې وروسته وویل، چې د ترکمنستان، افغانستان، پاکستان او هند د ګازو پایپ لاین یوه “ډېره ضروري” پروژه ده چې باید پرته له ځنډه پیل شي.
د یادې پروژې اقتصادي ارزښت
دغه پایپ لاین به د منځنۍ اسیا د انرژۍ بډای هېواد ترکمنستان د افغانستان له لارې پاکستان او هند سره ونښلوي او تمه کېږي، چې د ګالکینیش څخه د ۱۸۰۰ کیلومتره (۱۱۲۵ میل) په اوږدو کې به هر کال ۳۳ ملیارد متر مکعب طبیعي ګاز ولېږدوي.
نور ولولئ: د ټاپي پروژې تطبیق لپاره تخنیکي چمتووالی نیولی
نور ولولئ: د کاسا ۱۰۰۰ په اړه د دریو هېوادونو غوښتنه
تېره ورځ په اسلام اباد کې د خزانې سرپرست وزير شمشاد اختر په مشرۍ د اقتصادي همغږۍ کميټۍ (ایسيسي) غونډه وشوه، چې په کې د ټاپي او نورو اقتصادي چارو په اړه مشورتي فورم سره خبرې اترې وشوې.
د پاکستان د مالیې وزارت په یوه بیان کې وویل:« فورم ولیدل، چې ټاپي یوه ډېره اړینه پروژه ده او باید پرته له ځنډه پیل شي.»
د ټاپي د اصلي تړون له مخې به پاکستان، افغانستان او هند په سلو کې ۱۵ او ترکمنستان ۸۵ سلنه ګاز ولري.
په دې پروژه کې د پاکستان هڅه څه ده؟
پاکستان هڅه کوي چې د یادې پروژې تړون هغه برخه د ځان په ګټه واړوي چې اصلا ګټه یې افغانستان ته رسېږي. مثلاً: د ګازو د پلور او پېر د اوسني تړون له مخې، د ګازو د لېږد نقطه د افغانستان-ترکمنستان پوله ده، چې پاکستان غواړي د پاکستان-افغانستان پولې ته یې ولېږدوي.
پاکستان، چې د وارداتي ګازو له کمښت سره مخ دی، سږکال یې د برېښنا تولید په داسې یو اقدام کې کم کړ چې اقتصاد یې زیانمن کړ، لکه څنګه چې د انفلاسیون د لوړېدو او د اسعارو د راټیټېدو سره مخ شو.
بل لور ته د ټاپي پروژې کار په جمهوریت کې د پاکستان د غلطو سیاستونو له امله ځنډېدلی و، ځکه پاکستان په افغانستان کې د افغانستان اسلامي جمهوریت پرضد له وسله والو طالبانو نېغ ملاتړ کاوه او د ناامنۍ له امله نه شو کېدلی چې یاده پروژه پلي شي.