اسلام اباد کې تېره شپه په یو لړ عملیاتو کې افغان کډوال نیول شوي او وړل شوي دي
اړوند مطالب:
اسلام اباد: دا ځل به د افغان کډوالو د ایستلو لړۍ په پراخه کچه پیل شي
منظور پشتین: ایران کې له افغان کډوالو سره نامناسب چلند غندو
ځینو افغان کډوالو افغانستان انټرنشنل ته ويلي، چې تېره شپه د پاکستان پلازمېنه اسلام اباد په ایف ۱۸ فیصل ټاون سیمه کې پولیسو د افغان کډوالو د کورونو پلټنې او د هغوی د نیولو عملیات روان ساتلي و. وايي، تازه تر شلو پورې کسان له دغې سیمې نیول شوي.
له تېرې جمعې ورځې راهیسې په ټول اسلام اباد او د ورڅېرمه راولپنډۍ په هغوی سیمو کې د پاکستاني پولیسو عملیات روان دي چې افغان کډوال په کې اوسیږي.
پولیس وايي، هغه کډوال نیسي او بیرته یې افغانستان ته شړي، چې په دغه هیواد کې د اوسیدو قانوني اسناد نه لري، خو ډیری کډوال وايي، چې پولیسو داسې کورنۍ هم له پاکستانه ایستلې چې هغوی پاکستان کې د اوسیدو قانوني اسناد او بهرنیو هوادونو ته د تلو اسناد لرل.
تېره شپه د اسلام اباد په ایف ۱۸ فیصل ټاون سیمه کې پولیسو تر ۲۰ پورې افغان کډوال تازه نیولي او له ځان سره یې وړي.
د حلیمې بهار په نوم یوې افغانې کډوالې افغانستان انټرنشنل پښتو ته وویل، چې پولیسو بیا، بیا د فیصل ټاون سیمه وپلټله او تېره شپه یې هغه کسان ونیول چې په تېرو څو ورځو کې له پولیسو پټ شوي وو.
د دې تر څنګ د اسلام اباد له پېښور موړ څخه یو افغان کډوال چې نه یې غوښتل نوم یې خپور کړو افغانستان انټرنشنل ته وويل، چې د ډيریو کورنیو سړي له کورو وتلي او د ښار په څنډو کې شپې تیروي، چې ګنې پولیس یې ونه نیسي.
هغه وايي، همدا نن سهار د جي ۹/۴ په سیمه کې تازه پلټنې پیل شوې.
