د کابل ـ کندهار پر لاره د ټکر خونړیو پېښو ته د افغانستان د دوو مخکنیو ولسمشرانو غبرګونونه ښوولي دي
د افغانستان مخکني ولسمشر محمد اشرف غني د کابل ـ کندهار پر لویه لاره د سورلۍ موټرو د ټکر په پېښو خواشینې څرګنده کړې. د دې تر څنګ پخواني ولسمشر حامد کرزي هم په دغو پېښو خواشینې ښودلې او دواړو ولسمشرانو ټپیانو ته د بیړنۍ روغتیا دعاوې کړې.
د افغانستان مخکیني ولسمشر محمد اشرف غني نن پنجشنبه د (لیندۍ ۲۹مه) په خپله ایکس پاڼه په یوه یادښت کې د کابل ـ کندهار پر لویه لاره د تېرې شپې د سورلۍ د دوو بسونو او ټانکر او لارۍ موټرو د ټکر په پېښو خواشینې څرګنده کړې او د مړو شویو کسانو کورنیو ته یې تسلیت ویلی.
په یوه بل ټويټ کې د افغانستان پخواني ولسمشر حامد کرزي هم په دغو پېښو خواشینې ښودلې او تپیانو ته یې د عاجې روغتیا غوښتنه کړې او د مړو شویو افغانو کورنیو سره خپله غمرازي ښکاره کړې ده.
د طالبانو ویاند ذبیح الله مجاهد
په ایکس پاڼه د یوې خبرپاڼې په خپرولو سره ویلي، چې په دغې پېښه کې ۵۲ تنه مړه او ۶۵ نور ټپیان شوي.
نور ولولئ: افغانستان کې، تېرو ۶ میاشتو کې ۱۲ سوه کسان ترافیکي پېښو کې مړه شوي
نور ولولئ: تخار: په ترافیکي پیښه کې ۱۳ کسان وژل شوي او ۵ نور ژوبل شوي
تر دې وړاندې د طالبانو تر واک لاندې باختر اژانس په دوو ټویټونو کې دوه ډوله ارقام خپاره کړي چې د ذبیح الله مجاهد له خپرو شویو شمېرو سره توپیر لري.
د کابل-کندهار لویې لارې ترافیکي پېښو کې ۱۲۰ کسانو ته مرګ ژوبله اوښتي ده
لا هم د دغو پېښو د مړو او تپیانو د شمېر په اړه بېلابېلې شمېرې خپرېږي.
د کابل ـ کندهار پر لویه لاره د غزني په اړوند سیمه کې د تیرې شپې د موټرو د ټکر پېښو ته په کور دننه یو شمېر نور غبرګونونه هم ښودل شوي.
ګڼو افغانانو په خواله رسنیو کې
په دغو پېښو ژوره خواشبني ښودلې او د پېښو ټپیانو ته یې د بشپړې روغتیا هیله څرګنده کړې ده.
په هغو ویډیو ګانو او انځورونو کې چې افغانستان انټرنشنل ته رسیدلي ښکاري چې د لویو لارو د سورلۍ لوی بسونه ویجاړ شوي پراته او په وینو کې لت پت پراته ټپیان زګېروي کوي.
دا لومړی ځل نه دی چې په افغانستان کې پر لویو لارو د موټرو د ټکر په پېښو کې لسګونو کسانو ته مرګ ژوبله اوړي، تر دې وړاندې هم پر دغسې لارو د موټرو په ټکر کې خلکو ته درنه مرګ ژوبله اوښتې وه.
