افغانستان او اروپايي ټولنه د امنیت، نشهيي توکو پر ضد مبارزې او یو شمېر بشري او سیاسي موضوعاتو په اړه د اړیکو پر دوام خبرې کړې دي.
د طالبانو د بهرنیو چارو وزیر امیرخان متقي په کابل کې د افغانستان لپاره د اروپايي ټولنې له نوي ځانګړي استازي توماس فریلیسن سره کتلي دي.
د بهرنیو چارو وزارت د خبرپاڼې له مخې، دواړو لورو په دې لیدنه کې د افغانستان پر امنیتي وضعیت، له نشهيي توکو سره پر مبارزې او یو شمېر بشري او سیاسي مسایلو خبرې کړې دي. افغانستان او اروپايي ټولنه
افغانستان او اروپايي ټولنه؛ په لیدنه کې پر څه خبرې وشوې؟
د بهرنیو چارو وزارت ویلي، فریلیسن په افغانستان کې د امنیت او نشهيي توکو پر ضد د مبارزې په برخه کې د طالبانو د حکومت د اقداماتو یادونه کړې ده.
د وزارت د معلوماتو له مخې، د اروپايي ټولنې ځانګړي استازي ویلي چې د افغانستان امنیت او له نشهيي توکو سره مبارزه د اروپايي ټولنې لپاره مهم موضوعات دي.
هغه همداراز ویلي چې اروپايي ټولنه به هڅه وکړي له افغانستان سره په بېلابېلو برخو کې همکارۍ پراخې کړي.
خو په خپره شوې خبرپاڼه کې د کومې نوې مشخصې پروژې، مالي مرستې یا هوکړې د لاسلیک یادونه نه ده شوې.
متقي د بزګرانو لپاره د بدیل معیشت مرستې غواړي
امیرخان متقي په دې لیدنه کې ویلي چې نړیوالې ټولنې د نشهيي توکو پر ضد د مبارزې د لاسته راوړنو د ملاتړ لپاره افغان بزګرانو ته د بدیل معیشت په برخه کې لازمې مرستې نه دي برابرې کړې.
د هغه په وینا، د کوکنارو او نشهيي توکو د کښت د مخنیوي ترڅنګ اړتیا ده چې بزګرانو ته د عاید بدیلې لارې برابرې شي.
د وزارت خبرپاڼه ښيي چې افغانستان او اروپايي ټولنه غواړي د امنیت او نشهيي توکو ترڅنګ پر بشري او سیاسي مسایلو هم خبرو ته دوام ورکړي.
توماس فریلیسن تازه د افغانستان لپاره د اروپايي ټولنې د ځانګړي استازي په توګه ټاکل شوی او له افغان لوري سره یې دا کتنه د خپل نوي ماموریت په لړ کې کړې ده.
