اړوند خبرونه:
UNHRC د بشري حقونو په برخه کې د متحده عربي اماراتو موقف وستایه
د متحده عربي اماراتو خواخوږي؛ له زلزله ځپلو سره یې بېړنۍ مرسته وکړه
متحده عربي اماراتو کې له افغان مشرانو او سوداګرو سره د ټوماس وېسټ لیده کاته
د آلمان د بهرنیو چارو وزیر یوهان وادهفول د پنجشنبې په ورځ وویل، برلین د طالبانو له استازو سره یوازې په تخنیکي کچه اړیکې لري، نه تر دې ډېرې. هغه وویل چې آلمان به افغانستان کې د بشري حقونو د وضعیت څارلو ته دوام ورکړي.
د آلمان د کورنیو چارو د وزیر پرخلاف، چې په دې وروستیو کې یې افغانستان ته د مجرمو پناه غوښتونکو د ایستلو په موخه له طالبانو سره د مستقیمو خبرو اترو طرحه اعلان کړې وه، د بهرنیو چارو وزیر له طالبانو سره د دیپلوماتیکو اړیکو لپاره کومه زمینه نه ویني.
یوهان وادهفول د پنجشنبې په ورځ په ویانا کې له خپلو اتریشي او اسرائیلي سیالانو سره تر لیدنې وروسته وویل: “افغانستان کې د بشردوستانه وضعیت، د بشري حقونو وضعیت او په ځانګړي ډول د ښځو او نجونو د وضعیت په اړه ژورې اندېښنې شتون لري، او موږ د فدرالي حکومت په توګه، دا موارد به د طالبانو ډیفکټو (de facto) رژیم ته په ښکاره توګه مطرح کړو.”
دا په داسې حال کې ده چې د آلمان د کورنیو چارو وزیر د روانې میاشتې په لومړیو کې ویلي وو، غواړي له آلمانه د افغان پناه غوښتونکو د ایستلو د ممکنولو لپاره له طالبانو سره مخامخ خبرې وکړي.
د بهرنیو چارو وزیر روښانه کړه چې د دغه هېواد د کورنیو چارو وزارت هم له تخنیکي کچې پرته د طالبانو له استازو سره نورې اړیکې نه لري.
د ۲۰۲۱ کال له دوبي راهیسې چې طالبان په افغانستان کې واکمن دي، له آلمانه دغه هېواد ته د پناه غوښتونکو د ایستلو یوازې یوه الوتنه شوې ده. د تېر کال په اګست میاشت کې، ۲۸ تنه مجرم پناه غوښتونکي د قطر هېواد په مرسته له آلمانه کابل ته بېرته واستول شول.
د طالبانو ادارې پخوا چمتووالی ښودلی و چې له آلمان څخه د افغان پناه غوښتونکو په بېرته ستنولو کې همکاري وکړي، خو په بدل کې یې په آلمان کې د افغانستان پر سیاسي استازولیو د کنټرول او د قونسلګرۍ د خدمتونو وړاندې کولو غوښتنه کړې وه.
یوهان وادهفول د آلمان پخوانی دریځ یو ځل بیا تکرار کړ چې د طالبانو اداره د افغانستان د قانوني حکومت په توګه په رسمیت نه پېژني.
