اړوند خبرونه:
د ای سي ای لخوا د طالبانو پرضد د پخوانیو افغان سیاستوالو د کارولو نوي هڅه
م.م. کې د امریکا سفیره وايي، امریکا طالبان په رسمیت نه پیژني
ذبیح الله مجاهد: پخواني سیاستوال د ای ایس ای په مرسته بیا واک ته نه شي راتللی
د چین، ایران، پاکستان او روسیې د بهرنیو چارو وزیرانو د څلور اړخیزې ناستې په اعلامیه کې، یادو هېوادونو په افغانستان کې د بهرنیو ځواکونو له بېرته ځای پر ځای کېدو سره مخالفت څرګند کړی دی.
د «ګلوبل ټایمز» د راپور له مخې، د چین د بهرنیو چارو وزارت ویاند ګو جیاکن د تلې په ۴مه وویل، په دې غونډه کې د څلورو هېوادونو وزیرانو په ښکاره توګه له هغو «هېوادونو څخه چې د افغانستان د اوسني وضعیت مسوول دي» په پوځي اډو کې د ځواکونو د بېرته ځای پر ځای کولو مخالفت وکړ. د ده په وینا، د چین، روسیې، پاکستان او ایران وزیرانو دا اقدامات د سیمې د سولې او امنیت لپاره زیانمن وبلل.
هغه زیاته کړه: «دا اعلامیه په بشپړ ډول د افغانستان د ګاونډیانو د حاکمیت، خپلواکۍ او ملي عزت درناوی، او همدارنګه د نړیوالې ټولنې ګډه اراده چې د افغانستان د ثبات او بیا رغونې لپاره مرسته وکړي، څرګندوي.»
ده ټینګار وکړ: «چین د افغانستان د ګاونډي او یوه مسوول هېواد په توګه غواړي له نړیوالې ټولنې سره د افغان اړخ د ملاتړ لپاره خپلو همکاریو ته دوام ورکړي او د سولې او بیا رغونې په بهیر کې رغنده رول ولوبوي.»
د چین د بهرنیو چارو وزارت ځانګړي استازي یو شیاویونګ چې په دې غونډه کې ګډون کړی و، ټینګار یې وکړ چې هېوادونه باید د افغانستان حاکمیت، خپلواکۍ او ځمکنۍ بشپړتیا ته درناوی وکړي.
که څه هم د چین د بهرنیو چارو وزارت ویاند کوم ځانګړي هېواد یاد نه کړ، خو دا اعلامیه وروسته له هغې خپره شوه چې د امریکا ولسمشر ډونالد ټرمپ تېره اوونۍ اعلان وکړ، د ده اداره هڅه کوي د افغانستان بګرام هوايي اډه له طالبانو بېرته ترلاسه کړي.
پاکستان هم یو له هغو هیوادونو څخه و چې اعلامیه یې تایید کړې خو عملاً داسي ښکاري چې دې هیواد د ځینو امتیازونو د ترلاسه کولو په بدل کې د بګرام په ترلاسه کولو کې له امریکا سره همکارۍ ته غاړه ایښې ده.
ټرمپ همداراز تېره شنبه په «ټروت سوشل» کې لیکلي و: «که افغانستان د بګرام هوايي اډه بېرته هغه بنسټ ته چې جوړ کړی یې دی، یعنې متحده ایالاتو ته ور ونه ګرځوي، نو بدې پېښې به رامنځته شي.»
د «العربیه» سرچینو د چهارشنبې په ورځ راپور ورکړ چې د طالبانو مشر، هبت الله اخوندزاده، د بګرام هوايي اډې د برخلیک په اړه د یوې عاجلې غونډې غوښتنه کړې ده.
د العربیه د سرچینو په وینا، د طالبانو مشر په تېرو ورځو کې له خپلو یو شمېر جګپوړو چارواکو لکه دفاع وزیر، د بهرنیو چارو وزیر او د استخباراتو له مسوولانو سره محدودې غونډې کړي دي.
سرچینو زیاته کړه چې په دغو غونډو کې د بهرنیو ځواکونو د هر ډول بېرته راتګ په کلکه مخالفت شوی دی. دوی وویل د طالبانو هغه اعلامیه چې تېره یکشنبه د ټرمپ د څرګندونو په ځواب کې خپره شوه، د همدې غونډو د پایلو پر اساس په کندهار کې جوړه شوې وه.
له بلې خوا راپورونه وايي چې د بګرام د بېرته نیولو په باب د ټرمپ له خبرداریو وروسته د طالبانو دفاع وزیر د چین په بلنه او د ملا هبت الله اخوندزاده په موافقه پیکینګ ته سفر کوي.
