طالبان وايي، افغانستان کې د شري ناروغي خوره شوې او د پرې اخته کسانو شمېر زیات شوی دی
د ملګرو ملتونو د روغتيا نړيوال سازمان او په افغانستان کې د طالبانو حکومت د عامې روغتیا وزارت دواړه وايي، په دغه هېواد کې د شري یا سرخکان ناروغي پېښې ډېرې شوې دي.
د طالبانو د حکومت د عامې روغتیا وزارت وايي، په روان کال کې د شري ناروغۍ د مشکوکو پېښو له لسو زرو ډېرو ازموینو نژدې شپږ زره مثبتې ثبت وې.
د مثبتو پېښو ثبتېدل
د ملګرو ملتونو د روغتیا نړیوال سازمان د روان ۲۰۲۴ کال په تحلیلي راپور کې کښلي چې شری یا سرخکان د ۲۰۲۱ کال له نیمايي راهیسې په افغانستان کې په ډېرېدو دی. په دغه راپور کې راغلي چې یوازې په تېرو لسو میاشتو کې یې د هېواد په ټولو ۳۴ ولایتونو کې د شري شپږ زره مثبتې پېښې او له دغې ناروغۍ لږ تر لږه ۲۲۳ مړینې ثبت کړې دی.
د طالبانو د حکومت د عامې روغتیا وزارت ویاند شرافت زمان امرخېل وايي، د دغې ناروغۍ مشکوکې پېښې هم د تېر کال پرتله ډېرې شوې دي.
نور ولولئ: د خوړو پرته د وزن له لاسه ورکولو 8 لارې
نور ولولئ: د کوليسټرول (وينې غوړ) کمولو څو اسانه لارې چارې
“لکه څرنګه چې شری یا سرخکان يوه ساري وېروسي ناروغي ده، په افغانستان کې يې هم ځينې وخت د دغې ناروغۍ ګراف پورته کېږي، نسبتا تېر کال ته سږ له موږ سره د مشکوکو او مثبتو واقعاتو ګراف پو څه اندازه پورته شوی دی.”
د واکسین ملي کمپاین
ښاغلی امرخېل زیاتوي، دغه وزارت غواړي د راتلونکي میلادي کال په پیل کې د شري ناروغۍ د واکسين ملي کمپاین پلی کړي چې په کې به ۱۶ مېلیونه له لس کلونو ټیټ عمره ماشومان واکسین شي.
نوموړی وايي، “په نژدې مياشتو کې موږ پلان لرو چې د شري د واکسين ملي کمپاين تطبيق کړو، د دې په توسط سره به موږ وکولی شو چې په افغانستان کې د شري له زياتېدونکو واقعاتو مخنيوی وکړو. له ولسونو مو هم غوښتنه همدا ده چې په داسې حالتونو کې که د دوی ماشومانو کې نښې او علايم د سرخکان راښکاره کېږي، بايد نور ماشومان ورڅخه وژغورل شي او دوی په دغسې حالتونو کې روغتيايي مرکزونو ته مراجعه وکړي تر څو د دوی د ماشومانو ژوند له خطر سره مخ نشي.”
دغه وزارت له دې وړاندې د کورنیو بې ځایه شوو شمېر ډېرېدل او د کډوالو په تېره بیا له پاکستانه ورستنېدل هم د شري د ناروغۍ لا خپرېدو لامل بللي و.
