ایراني پولیسو هغه افغانه څېړونکې د حجاب نه مراعتولو په تور له ایرانه شړلي چې د اوسېدو ټول قانوني اسناد یې لرل
کبرا غلامي ته دومره اجازه هم نه ده ورکړل شوې چې له خپلې کورنۍ او دوستانو سره وګوري یا ورسره خدای پاماني وکړي.
د ایراني پولیسو له لوري ورته مخکې هم د حجاب مراعتولو په اړه خبر ورکړل شوی و.
د ایران له خاورې د کبرا غلامي د وېستلو په اړه ایرانيو مېرمنو په ټولنیزو رسنیو کلک غبرګونونه ښوولي دي.
له ایرانه د کبرا غلامي ویستل کېدل
ایراني پولیسو ټولنیزه افغانه څېړونکې کبرا غلامي د ایران پاسپورټ ادارې ته وربللې او وروسته یې له دې امله له خپلې خاورې اېستې ده، چې د دوی د خوښې حجاب ته یې پاملرنه نه کوله.
داسې ویل کېږي، چې نوموړې په ایران کې د پاتې کېدو ټول قانوني اسناد هم لرل.
نور ولولئ: اروپايي ټولنه وايي افغانستان په نړۍ کې د اقلیم تر سختو اغیزو لاندې هېوادونو په لېست څلورم هیواد دی
نور ولولئ: اروپايي ټولنه: له پاکستانه راغلو افغان کډوالو سره ۶۱ میلیونه یورو مرسته کوو
د خواله رسنیو یو شمېر کاروونکو او د کبرا غلامي خواخوږو ویلي، چې دغه افغانه څېړونکې د پنجشنبې په ورځ (د زمري په ۱۱مه نېټه) له هغې وروسته چې د خپل حجاب د وضاحت ورکولو په اړه یې څو پیغامونه تر لاسه کړل؛ نو د پاسپورټ دفتر ته ور وبلل شوه، وروسته پولیسو ونیوله او هغه یې د کورنۍ له نورو غړو پرته د څو ساعتونو په ترڅ کې له ایرانه واېستله.
د خواله رسنیو کاروونکو د «#کبرا_به بېرته_راستنه کړو» د هشتګ په کارولو سره خپلې اندېښنې شریکې کړې او بېرته یې ایران ته د هغې د ستنولو غوښتنه کړې.
له کبرا غلامي سره څوک نه و
د خواله رسنیو یوې ایرانۍ کاروونکې شیما واعظي په خپله اېکس پاڼه لیکلي: «دا مهال کبرا په موټر کې ده او په دې نه ده توانېدلې، چې د خپلو دوستانو او د کورنۍ له غړو سره خدای په اماني وکړي. هغې په ایران کې د اوسېدو لپاره ټول قانوني اسناد لرل او د الزهرا په پوهنتون کې یې د ماسټرۍ لوړې زدهکړې هم کړې وې.»
کبرا غلامي تېر کال په ایران کې یوې ټولنیزې – فرهنګي غونډې ته چې د «مېرمنو د فرهنګي او ټولنیز پرمختګ» تر سر لیک لاندې جوړه شوې وه په ایران کې یې «د افغان مېرمنو سره د ظلم او زور زیاتي» په اړه وینا وکړه او په خپلو خبرو کې یې له افغان مېرمنو سره د ایراني چارواکو د نارواو په اړه سختې نیوکې هم کړې وې.
د یادونې وړ ده چې په ایران کې افغان کډوال له ګڼو ستونزو سره مخامخ دي.
