افغان کرکټ ټیم پاکستان ته پرلپسې دویمه ماتې ورکړه
![GettyImages 1145822283](https://afghannow.net/wp-content/uploads/2023/03/GettyImages-1145822283.jpg)
د افغانستان اتلې کرکټ ملي لوبډلې د دریو نړیوالو شل اوریزو سیالیو د لوبلړۍ په دویمه سیالۍ کې د پاکستان ملي لوبډلې ته د ۷ ویکټو په توپیر سره ماتې ورکړه
افغان اتلانو د خپلې دوه اړخیزې کارکردګۍ پر مټ لومړی د پاکستان لوبډله ۱۳۱ منډو ته رامحدوده کړه او ورپسې یې ټاکلی هدف د لوبې په وروستي اور کې یوازې د دریو لوبغاړو په سوځېدو سره ترلاسه کړ.
افغانستان د پوره غړیتوب لرونکو لوبډلو له ډلې د ویسټ انډيز، بنګله دېش، زمبابوې او ایرلینډ څخه وروسته وکولی شول چې په دوه اړخیزه شل اوریزه لوبلړۍ کې (۲-۰) پاکستان ته هم ماتې ورکړي.
د پرونۍ سیالۍ پچه د دویم ځل لپاره پاکستان کرکټ لوبډلې وګټله او لومړی یې خپله د توپوهنې پرېکړه وکړه خو د افغانستان کرکټ ملي لوبډلې د توپ اچوونکو په زړه پورې توپ اچونې یاده لوبډله یوازې تر ۱۳۱ منډو محدوده کړه. د پاکستان په ګټه عماد وسیم ۶۴ او لوبډلمشر شاداب خان ۳۲ ناسوزيدلې منډې ترسره کړې. د افغانستان په ګټه فضل الحق فاروقي ښکلې توپ اچونه ترسره کړه نوموړي د پاکستان لومړۍ دوه ویکټې په خپل لومړي اور کې ترلاسه کړې. ورسره نوین الحق، راشد خان او کریم جنت هر یوه یو- یو لوبغاړی د لوبې له ډګره بهر کړ.
بلخوا د افغانستان کرکټ لوبډلې له لوري ښکلې ډګر ساتنه هم ترسره شوه
د پاکستان له لوري ټاکل شوی هدف افغان ملي لوبډلې د رحمان الله ګربز د ۴۴، ابراهیم ځدراڼ ۳۸، نجیب الله ځدراڼ ۲۳ او محمدنبي ۱۴ منډو پر مټ د لوبې په وروستي اور کې ترلاسه کړی او په یادې بریا سره یې دا لوبلړۍ مخکې له مخکې ۲-۰ د افغانستان په نوم کړه. د پاکستان له لوري زمان خان او احسان الله هر یوه یو- یو ویکټ په خپل نوم کړه. رحمان الله ګربز د لوبې د انرجیټیک او فضل الحق فاروقي د لوبې د غوره لوبغاړي جایزې ترلاسه کړې.
نور ولولئ: افغانستان کرکټ ملي لوبډلې د پاکستان کرکټ ملي لوبډلې ته ماتې ورکړه
دغه لوبې ته د افغانستان او پاکستان کرکټ لوبډلو ګڼ شمېر مینه وال راغلي وو او دواړه لوبډلې يې پوره هڅولې.
د دغه لوبلړۍ وروستۍ لوبه د افغان کرکټ لوبډلې په کوربه توب نن ماښام ترسره کيږي.
د یادونې وړ ده چې افغانستان به له پاکستان سره د روانې لوبلړۍ وروستۍ شل اوریزه سیالي نن شپه ۸:۳۰ بجې د متحده عربي امارتو په شارجه لوبغالي کې ترسره کړي.