امرالله صالح خپلو منتقدینو ته؛ د طالب ضد خوځښتونه پښتنو کې وو او دي
![afghan 2024 07 11t094122.142](https://afghannow.net/wp-content/uploads/2024/07/Afghan-2024-07-11T094122.142-780x470.jpg)
د پرځېدلي جمهوریت مرستیال امرالله صالح خپلو منتقدینو ته وايي، د طالب ضد خوځښتونه پښتنو کې وو او دي
د پرځیدلي جمهوري نظام لومړي مرستیال امرالله صالح په یوه لیکنه کې له پښتون ژغورنې غورځنګ څخه د ده د ملاتړ دلایل روښانه کړي.
هغه دې ته په اشارې، چې یو شمېر فارسي ژبو منتقدانو یې د دغه غورځنګ د مخکښ غړي ګیله من وزیر په اړه خواخوږۍ ته توند غبرګونونه ښودلی وو، په یوه مفصله لیکنه کې په دې اړه توضیحات ورکړي.
د طالبانو د شمېر اټکل
ښاغلي صالح لیکلي: طالبان د جمهوري نظام له سقوط مخکې تر ۵۰ زرو پورې جنګیالی لرل او افغانستان د یوې دسیسې په بایله کې دغې ډلې ته سپارل شوی.
د هغه په وینا، د دې ډلې خلاف د ډیورنډ کرښې دواړو غاړو ته لسګونه مخالفې ډلې موجودې وې او دي، چې پر ضد یې مبارزه کوي.
نور ولولئ: محسن داوړ د پاکستانیو پولیسو په ډزو ژوبل شوی
نور ولولئ: پر ګیله من وزیر برید ته د افغان ولسمشرانو او سیاسیونو غبرګونونه
صالح زیاتوي، چې ځینې فارسي ژبې برتري غوښتونکي تمه لري چې پښتانه طالب ضد دې د خپل هویت له هېرولو سره د دوی په ژبه د طالبانو خلاف مبارزه وکړي، په داسې حال کې چې دا نا معقوله غوښتنه ده.
![screenshot 2024 07 11 093357](https://afghannow.net/wp-content/uploads/2024/07/Screenshot-2024-07-11-093357-277x300.png)
د صالح په باور، د طالبانو خلاف تر ټولو ښه مبارزه په پښتو ژبه کېدای شي.
د جمهوري نظام په اړه د پښتون ژغورنې غورځنګ دریځ
نوموړی د جمهوري نظام له سقوط وروسته وضعیت ته په اشارې وایي، چې دغه مهال ډېرو جمهوریتیانو د یو بل خلاف پیغورونه او کنایې ویلې، خو د پښتون ژغورنې غورځنګ مشرانو ورسره اړیکې نیولې او د جمهوري نظام په ملاتړ یې تر ټولو ښه دریځ نیولی و.
صالح د محسن داوړ یادونه کړې، چې د طالبانو په لاس یې د ده د ورور له وژل کېدو وروسته په فارسي ژبه د تسلیت اعلامیه خپره کړه او غمرازي یې ورسره وکړه.
د ده په وینا، دا د فارسي ژبې په اصطلاح« عیاري» وه، چې وشوه.
صالح دا هم ویلي، چې که یوه ورځ د جمهوریت د حرام خورو او نمک حرامو لېست خپور شي، ډېر جالب به وي.