زلمي خلیلزاد او ورسره پلاوي د طالبانو له بهرنیو چارو وزیر امیرخان متقي سره لیدلي دي.
د افغانستان لپاره د امریکا پخواني ځانګړي استازي زلمی خلیلزاد او د امریکا د ولسمشر ځانګړي استازي آدم بوهرلر د طالبانو له بهرنیو چارو له وزیر امیرخان متقي سره په کابل کې ولیدل.
د طالبانو د بهرنیو چارو وزارت نن (پنجشنبې) د ښاغلیو متقي او خلیلزاد د کتنې خبر خپور کړ، ویې ویل چې دواړو خواوو د افغانستان او امریکا پر اړیکو، د افغان اتباعو لپاره پر کونسلي خدمتونو، او د بندیانو تبادلې په اړه خبرې وکړې.
امیرخان متقي د امریکا پلاوي ته ښه راغلاست ووایه او دا لیدنه یې د دواړو هېوادونو ترمنځ د اړیکو د ښهوالي لپاره مثبت ګام وباله.
د خبرپاڼې له مخې، متقي وویل، د دوی حکومت د متوازن بهرني سیاست غوښتونکي دي.، له ټولو خواوو سره رغنده تعامل ته ژمن دي.
ده دا هم وویل چې د طالبانو او واشنګټن ترمنځ د پاتې ستونزو د حل لپاره خبرې اترې اړینې دي.
متقي وویل:«دواړه هېوادونه باید د ۲۰ کلنې جګړې پایلو ته د پای ټکی کېږدي او مثبتې سیاسي او اقتصادي اړیکې جوړې کړي.»
د طالبانو د باندنیو چارو وزارت د خبرپاڼې پر اساس، آدم بوهرلر د بندیانو په تبادلې کې پرمختګ د باور جوړونې لپاره مهم ګام وباله.
هغه ټینګار وکړ چې دواړه لوري باید خبرو ته دوام ورکړي.
بوهرلر زیاته کړه:«امریکا او افغانستان تاریخي اړیکې درلودې، چې له ننګونو سره مل وې، خو اوس باید راتلونکي ته وکتل شي.»
د ۲۰۲۱ د اګست په ۱۵ مه د افغانستان د جمهوري حکومت له پرزېدو او د طالبانو له بیا واک ته رسیدو وروسته افغانستان ته د زلمي خلیلزاد لومړنی ښکاره سفر دی.
زلمی خلیلزاد که څه هم د امریکا په اوسني حکومت کې کومه رسمي دنده نه لري خو دې ته په کتو چې نوموړی د امریکا د اوسني واکمن ګوند، جمهوریپال غړی دی، کابل ته د ده سفر د طالبانو له حکومت سره د ټرمپ د حکومت لومړنی مخامخ تماس ګڼل کېدای شی.
خلیلزاد د ۲۰۲۰ کال د دوحې تړون د خبرو اساسي لوبغاړی و، چې د امریکا د وتلو او د طالبانو د واک ته رسېدو لامل شو.
