بث ون شاک وايي، د ښځو پر وړاندې د طالبانو دریځ کټ مټ هغه تبعیضي چلند دی چې په سویلي افریقا کې روان و
د نړۍوال جنایي عدالت په چارو کې د امریکا سفیرې بث ون شاک، د نجونو پر زدهکړو بندیز د طالبانو “تر ټولو ظالمانه” عمل وباله.
نوموړې ویلي، چې د ښځو پر وړاندې د طالبانو چلند په سویلي افریقا کې نژادي تبعیض ته ورته دی.
نور ولولئ: متقي دوحه کې د یو شمېر هېوادونو له استازو غوښتي چې له کابل ماموریت ترسره کړئ
له دې سره اغلې ون شاک څرګنده کړه، چې امریکا اوسمهال په افغانستان کې د جنسیتي تبعیض په اړه کوم ځانګړی دریځ نه لري.
د نژادي تبعیض قانون
په سویلي افریقا کې د نژادي تبعیض قانون په ۱۹۴۸ کال کې تصویب شو.
د دغه قانون له مخې تور پوستي د تابعیت له حقه بې برخې وو، او اکثریتو یې په «تورو کمپونو» کې ژوند کاوه.
دوی په دغه هېواد کې خرابې شوې عامه اسانتیاوې، جلا ښاري خدمتونه او د لېږد رالېږد له زړو وسایلو ګټه اخېسته، ان دوی ته اجازه نه وه چې عامه روغتیایي خدمتونه وکاروي.
څه موده وړاندې د ملګرو ملتونو د بشري حقونو ځانګړي راپور ورکوونکي ریچارډ بېنټ هم ویلي و، چې په افغانستان کې د ښځو پر وړاندې د طالبانو “سخت او سیسټماتیک تبعیض” د جنسیت توپیر ګڼل کېدای شي.
په ټوله نړۍ کې افغان فعالانو په وار، وار سره د لاریونونو په ترڅ کې پر حکومتونو غږ کړی، چې د ښځو پر وړاندې د طالبانو کړنې د جنسیتي توپیر په توګه وپېژني.
کېدای شي دا موضوع د نړیوال جرم په توګه وپېژندل شي
که د دوی دغه کمپاینونه بریالي شي، د ښځو پر وړاندې به د طالبانو پالیسي د نړیوال جرم په توګه وپېژندل شي او د څارنې وړ جرم په توګه به وپېژندل شي.
بث ون شاک وویل، «موږ په افغانستان کې یوه ځانګړې استازې لرو، چې د ښځو او نجونو او د هغوی پر ستونزو کار کوي او هغه د نجونو او ښځو د ژوند د ښه کولو له پاره په دوامداره توګه له طالب چارواکو سره په تماس کې ده.»
ون شاک د یوه خبري کنفرانس پر مهال وویل، چې امریکا د طالبانو لهخوا د ښځو ځورول په ډېر ځير څاري.
نور ولولئ: رینا امیري د نجونو زده کړې اهمیت لرونکي بولي
هغې وویل، «د جرمونو نړۍوالې محکمې خپلې څېړنې پیل کړې او دې ته یې هم اشاره وکړه، چې په افغانستان کې به د طالبانو او نورو ډلو جنایتونو ته لومړیتوب ورکوي او دغې محکمې د ښځو د جنسي ځورونې په اړه یو لوړ پوړی او ځانګړی وکیل ټاکلی دی.»
خو طالبان بیا د نړیوالو بنسټونو او چارواکو دا ډول څرګندونې بابیزه ګڼي او وايي چې دا زموږ په داخلي چارو کې لاسوهنه ده.
