په امریکا کې ویجاړونکې اورلګېدنه د هالیوډ تر غونډۍ ورسېده
اړوند مطلب:
کالیفورنیا کې ځنګلي اور له کنټرول وتلی او زرګونه کسان له خپلو سیمو وځي
د امریکايي رسنیو د راپورونو پر بنسټ، په لاس انجلس کې د پراخې اورلګېدنې لمنه د هالیوډ تر غونډۍ رسېدلې ده.
رویټرز پنجشنبه د جنورۍ پر ۹مه راپور ورکړی چې پنځه نورې اورلګېدنې د هالیوډ څلي ته نږدې رامنځته شوي او خلکو ته له دې سیمې څخه د تخلیې امر شوی دی.
په راپور کې راغلي چې په لاس انجلس کې د جیمي کورټیس، منډي مور، او ماریا شریور په ګډون ډېریو مشهورو شخصیتونو د روانې اورلګېدنې له امله خپل کورونه پرېښې دي.
د راپور پر بنسټ، قوي بادونو د اوروژنې عملیات له خنډ سره مخ کړي دي.
رویټرز لیکلي چې شاوخوا ۱۰۰ زرو کسانو ته امر شوی څو خپل کورونه پرېږدي.
د لاس انجلس چارواکو روانه اورلګېدنه ویجاړونکې بللې او زیاته کړې یې ده چې دا د امریکا په تاریخ کې بېمخینې ده.
ورته مهال، د دغه ښار چارواکو په په دې سیمه کې بېړنی وضعیت اعلان کړی دی.
د معلوماتو له مخې، دې اورلګېدنې تر اوسه پورې پنځه کسان مړه کړي او سلګونه کورونه یې سوځولي دي.
د امریکا ولسمشر جو بایډن دا پېښه «حیرانونکې» بللې ده.
