د طالبانو د بهرنیو چارو وزیر امیرخان متقي ویلي چې پاکستاني طالبان له اسلام اباد سره هوکړې ته رسېدلي وو، خو حکومت دا فرصت ضایع کړ
پاکستانۍ رسنۍ اېکسپرېس ټریبیون د پاکستاني سناتور مشاهد حسین سید په حواله چې په تهران کې د طالبانو د بهرنیو چارو له وزیر سره کتلي، لیکلي چې متقي ورته ویلي چې د پاکستان تحریک طالبان او د پاکستان د افغان طالبانو په منځګړیتوب یوې هوکړې ته نږدې شوي وو، خو د پاکستان حکومت شا تګ وکړ.
نور ولولئ: د افغان کډوالو په اړه له پاکستان او طالبانو د چین غوښتنه
پاکستاني سناتور مشاهد حسین سید چې په تهران کې د فلسطین د ملاتړ په کنفرانس کې برخه اخیستې وه، پاکستانۍ رسنۍ اېکسپرېس ټریبیون ته ویلي، چې د کنفرانس په څنډه کې یې د طالبانو د بهرنیو چارو له وزیر سره مفصلې غیر رسمي خبرې کړې دي چې تمرکز یې د افغانستان او د پاکستان د اړیکو د اوسني وضعیت او د پاکستان تحریک طالبان (ټي، ټي،پي) و.
طالبان هڅه کوي چې ستونزې د خبرو له لارې حل کړي
د طالبانو د بهرنیو چارو وزیر دغه پاکستاني سیاستوال ته ویلي، چې طالبان غواړي له اسلام اباد سره خپلې ټولې ستونزې د خبرو له لارې حل کړي.
متقي همداراز زیاته کړې، چې په کابل کې د پاکستاني چارواکو او د پاکستاني طالبانو د تحریک د مرکچي ډلو تر منځ له یو لړ لیدنو وروسته ډېری مسایل حل شوي و او دواړه لوري د افغان طالبانو په منځګړتوب یوې هوکړې ته نږدې شوي و.
افغان طالبانو په ځانګړي ډول حقاني ډلې پر افغانستان له واکمنۍ سره سم په لومړیو میاشتو کې په کابل کې د تحریک طالبان پاکستان او د پاکستاني حکومت ترمنځ د سولې د خبرو اترو منځګړیتوب کړی و، خو دا خبرې بالاخره بې پایلې پاتې شوې.
اسلام اباد په دغو خبرو کې د یوې هوکړې د ترلاسه کولو لپاره پاکستان طالبان ته یو لړ شرطونه ایښي و، چې پاکستاني طالبان به د حکومت حاکمیت، اساسي قانون مني.
د قبایلي سیمو خپلواکي
له ډیورنډ کرښې ته څېرمه د پاکستان قبایلي سیمې پخوا د پاکستان د حکومت تر کنټرول لاندې نه وې او په خپلواکه توګه یې فعالیت کاوه.
نور ولولئ: اسلام اباد د پاکستاني وسلهوالو د برید په تړاو د طالبانو سفیر احضار کړی
د پاکستاني طالبانو د سولې په خبرو کې یو شرط دا و چې پاکستان به قبایلي سیمې د پخوا په څېر خپلواکه کوي او خپل نظامیان به له دغو سیمو وباسي.
د معلومات به مخې پاکستاني طالبانو بل شرط دا و، چې دوي به په قبایلو سیمو کې به شریعت نافذوي.
افغان طالبانو د پاکستان له حکومت سره اوږدې او نږدې اړیکې درلودې، خو په افغانستان کې د طالبانو له واک ته رسېدو وروسته په پاکستان کې د ترهګریزو بریدونو شدت دغه اړیکې په ظاهره ترینګلې کړي دي.
