امیر عبدالمهیان: موږ په پاکستان کې ترهګر وژلي، نه پاکستانیان
![iran](https://afghannow.net/wp-content/uploads/2024/01/Iran-2-780x470.jpg)
د ایران بهرنیو چارو وزیر وايي چې موږ په پاکستان کې د ایران دښمنان په نښه کړي دي
د ایران د بهرنیو چارو وزیر حسین امیرعبداللهیان نن د سویس په داووس ښار کې د نړۍوال اقتصادي فورم په څنډه کې رسنیو ته وویل، پر پاکستان د دوی د برید موخه “په پاکستان کې ایراني ترهګر ” وو.
هغه تاکید کړی، چې د ایران بې پیلوټه الوتکو او توغندیو هېڅ یو پاکستانی وګړی نه دی په نښه کړی.
د ایران بهرنیو چارو وزیر پاکستان یو ښه ګاونډی، دوست او ورور وباله او ویې ویل: “د جیش العدل په نامه ډلې د پاکستان په ځینو برخو کې پناه اخیستې او په دې اړه مو څو ځلې د پاکستان له لوړ پوړو پوځي، امنیتي او سیاسي چارواکو سره خبرې کړې دي او دغو ترهګرو ډلو په تېرو ورځو کې په ایران کې عملیات کړي دي. د نورو شیانو تر څنګ یې د راسک په قوماندانۍ کې زموږ د پولیسو سرتیري شهیدان کړل. دا ایراني ترهګرو ته په پاکستان کې زموږ ځواب دی.”
پر جیش العدل او عراق د ایران بریدونه
امیر عبداللهیان ویلي، چې له رسنیو سره تر خبرو مخکې یې د پاکستان د بهرنیو چارو له وزیر سره د برید په اړه خبرې کړې وې.
ایران پر پاکستان سربېره په عراق او سوریه کې هم بریدونه کړي، چې اسلام اباد او بغداد د خپلې بشپړتیا خلاف ورزي بللې ده.
نور ولولئ: ایران د حزر سمندرګي قطعې ته د دیلمان په نوم نوي بېړۍ ورزیاته کړه
نور ولولئ: سي ای اې وايي، روسیه د ایران په همکارۍ د ډرون الوتکو کارخانه جوړوي
نور ولولئ: د افغانستان بد حالات؛ پاکستان او ایران د افغانانو ملاتړ خپل مسئولیت بولي
په مقابل کې حسین امیر عبدالهیان وايي، ایران د پاکستان او عراق ملي حاکمیت او ځمکنۍ بشپړتیا ته احترام لري خو : “مونږ به هغوی ته اجازه ورنه کړو چې زمونږ د هېواد له ملي امنیت سره لوبې وکړی او مونږ له ترهګرو سره د خپل هېواد د ملي امنیت په تامینولو کې هېڅ ډول پېژاند نه لرو.”
![iran1](https://afghannow.net/wp-content/uploads/2024/01/Iran1-1-300x170.jpg)
له دې مخکې د پاکستان د بهرنیو چارو د وزارت ویاندې ممتاز زهرا بلوچ د دغه هېواد پر خاوره د ایران د توغندیزې حملې په غبرګون کې دغه اقدام د ایران له خوا د پاکستان له ځمکنۍ بشپړتیا څخه سرغړونه وبلله او ټینګار یې وکړ، چې د تېرې شپې حملې بې اساسه او څرګندې دی.
پاکستان دغه بریدونه غندلي
د هغې په خبره، د ایران دا برید د پاکستان له ملي حاکمیت او د نړۍوالو قوانینو او د ملګرو ملتونو د منشور له اهدافو او اصولو سرغړونه ده.
نوموړې زیاته کړې: ” دغه غیر دقانوني اقدام په بشپړه توګه د منلو وړ نه دی او هېڅ توجیه نه لري.”
بلوچ وايي، پاکستان د دې غیر قانوني اقدام پر وړاندې د ځواب ویلو حق لري او پایلې به یې په ایران پورې تړلې وې.
اسلام اباد ټینګار کړی، چې خپل پیغام یې د ایران حکومت ته رسولی دی.
اسلام اباد ادعا کړې چې د ایران په دغه برید کې دوه پاکستاني ماشومان هم وژل شوي، خو ایران بیا دا ډول تورونه ردوي او وايي دوی یوازې ترهګر په نښه کړي دي.