د ملګرو ملتونو د سازمان سرمنشي د افغانستان د اوسني وضعیت په اړه نورې اندېښنې هم شریکې کړي دي
د ملګرو ملتونو سرمنشي انټونیو ګوتریش د ښځو له حقونو څخه په جدي سرغړونو، د توکمیزو ډلو پر وړاندې تبعیض او همدارنګه نورو هېوادونو ته له افغانستان څخه د ترهګرۍ پر لېږد اندېښنه څرګنده کړه.
انټونیو ګوتریش د افغانستان انټرنشنل د خبریال د یوې پوښتنې په ځواب کې د طالبانو د رژیم تر ټولو ناوړه ځانګړنه د ښځو په وړاندې سخت بندیزونه او ځورول بللې ده.
د ملګرو ملتونو سرمنشي انټونیو ګوتریش د افغانستان انټرنشنل خبریالې مریم رحمتي ته وویل، چې دوی به د افغانستان په اړه یوه فوق العاده غونډه وکړي.
د ښځو د محدودولو لپاره تر ۷۰ ډېر فارمانونه
هغه زیاته کړه، چې په دې غونډه کې به د “بشري حقونو، په ځانګړې توګه د ښځو له حقونو څخه د پراخو سرغړونو” په اړه خبرې وشي، کوم چې هغه “د طالبانو د رژیم تر ټولو وحشتناک اړخ” بللی.
طالبانو د ښځو د حقونو او ازادیو د محدودیت په اړه تر ۷۰ ډېر فرمانونه صادر کړي دي.
د ښځو پر ازادۍ او بنسټیزو حقونو وروستی ګوزار د امربالمعروف د نوي قانون توشېح کېدل وو.
نور ولولئ: ګورډن براون: د طالبانو له خوا د افغان ښځو او نجونو ځورول د بشریت ضد جنایت دی
نور ولولئ: امریکايي سفیرې د طالبانو پر وړاندې د نړۍ هېوادونه یو والي ته راوبلل
نور ولولئ: طالبان افغانستان کې ښځې له کار او زده کړو منع کوي، خو بهر کې له نیم لوڅو سره انځورونه اخلي
د امنیت شورا په نننۍ غونډه کې له چین او روسیې پرته ټولو هېوادونو چې د طالبانو متحدین دي، د امربالمعروف قانون غندلی دی.
ګوتریش په یوه خبري کنفرانس کې وویل: “موږ په افغانستان کې د اوسني استبدادي رژیم په چوکاټ کې د توکمیزو ډلو پر وړاندې د ټولو بشري حقونو سرغړونو او تبعیض په اړه ژور اندېښمن یو.”
په افغانستان کې د ترهګرو ډلو د ودې ویره
ګوترش په افغانستان کې له ترهګرو ډلو د طالبانو د ملاتړ په اړه هم اندېښنه څرګنده کړه او خبرداری یې ورکړ، چې دغه ډلې کولای شي نورو هېوادونو ته نفوذ وکړي.
د چهارشنبې په ورځ د امنیت شورا په غونډه کې د روسیې په ګډون یو شمېر هېوادونو په افغانستان کې د داعش او القاعده ډلو تر څنګ د نورو وسله والو ډلو د فعالیتونو او پراخېدو په اړه اندېښنه وښوده.
د روسیې سفیر ویلي، د داعش پر وړاندې د طالبانو له اقداماتو سره – سره دغه ډله توانېدلې چې په نورو هېوادونو کې هم بریدونه وکړي.
خو له دې سره، سره پر ملګرو ملتونو او نړیوالو نیوکه داده چې دوی له طالبانو سره د تعامل هڅه کوي، خو طالبان بیا د ښځو د حقونو مسئله په دوی پورې محدودې بولي.
