د یوناما مشره وايي چې طالبان په دې عمل سره افغانستان نور هم منزوي کوي

په افغانستان کې د ملګروملتونو د عمومي منشي ځانګړې استازې او د یوناما مشرې روزا اوتنبایووا د زده کړو د نړیوالې ورځې په مناسبت په پیغام ویلي چې د نجونو او ښځو د زده کړو په برخه کې د طالبانو د حکومت روانه کړنلاره د افغانستان د لا منزوي کیدو سبب ګرځي.

د چهارشنبې ورځ جنورۍ ۲۴( سلواغې څلورم) د زده کړو نړیوالې ورځې په توګه په نړۍ کې لمانځل کیږي.

د ښځو زده کړو ته اجازه ورکول د اسلامي هېوادونو غوښتنه

روزا اوتنبایووا په دې مناسبت په یو ویډیوي پیغام کې چې د یوناما له خوا خپور شوی ویلي افغانستان کې د نجونو او ښځو د زده کړو د اجازې غوښتنه یوازې د لودیځو هیوادونو غوښتنه نه ده بلکې د اسلامي نړۍ غوښتنه هم ده.

میرمن اوتنبایووا ویلي چې په دې وروستیو کې یې په سعودي عربستان کې د اسلامي همکاریو سازمان له مرکز څخه لیدنه کړې او هلته هم په دې اړه بحثونه شوي دي.

د یوناما مشرې ویلي چې دا د طالبانو د حکومت اساسي وظیفه ده چې د جنسیت ته د پاملرنې پرته د ټولو کسانو د زده کړو له حق څخه ملاتړ وکړي او د زده کړو د ښه کیدو لپاره کار وکړي.

نور ولولئ:  یوناما وايي، ۱۵ زره کسان د طالبانو په زندانونو کې پراته دي

نور ولولئ: طالبان د ښځو د نیونو په تړاو د یوناما اندېښنې بې ځایه بولي

نور ولولئ: د افغان ښځو او نجونو د نیولو پر سر د طالبانو او یوناما ناندرۍ

میرمن اوتنبایووا ویلي:” په اوسني مسیر باندې ټینګار یوازې ټولو افغانانو ته لا زیات زیان رسوي او افغانستان د اسلامي نړۍ او نړیوالې ټولنې څخه په انزوا کې ساتي. د همدې له امله زه د حاکمو چارواکو (طالبانو) څخه غواړم چې دا درک کړي چې زده کړې یوازې یو اخلاقي اړتیا نه ده، بلکې د یوې ټولنې د هوساینې او سولې لپاره خورا زیاته مهمه مسله ده”.

ټولو ته د زده کړو یو ډول حق ورکول

افغانستان کې د ملګروملتونو دغې لوړپورې چارواکې د زده کړو نړیواله ورځ د تلپاتې سولې لپاره د زده کړو په اهمیت باندې د پوهیدلو لپاره یو ښه فرصت ګڼلی او ویلي دي چې په افغانستان کې هم ټولو نجونو، ښځو، هلکانو او سړیو ته زده کړې د هغوی د یو حق څخه زیاتې مهمې ګڼل کیږي.

روزا اوتنبایووا وویل چې زده کړې د افغانستان راتلونکی بنیاد جوړوي او ټینګار یې کړی چې ددغه هیواد د نن او سبا د ګواښونو پر وړاندې د مقابلې لپاره زده کړې لکه څنګه چې کاراو کسب، متحرک اقتصاد، د طبیعي پیښو اود اقلیم د بدلون د اغیزو د کمولو لپاره اړتیا ده دغسې اړینې دي.

روزا اوتنبایووا وویل چې افغانانو پخوا شاعران، معماران، پوهان او حتی ستور منزلي نړۍ ته ورپیژندلي دي او په دې میراث باید افغانان و ویاړي.