اړوند خبرونه:
د امو نفتي حوزې د ۸ څاګانو استخراج پیل شو
د افغانستان سرپل ولایت کې هره ورځ د ۹۰۰ټنه نفتو استخراج
غلامحسین مظفري، د ایران د خراسان والي، له طالبانو سره د افغانستان د قیمتي او معدني ډبرو د استخراج او پروسس په برخه کې د همکارۍ د پلان خبر ورکړی دی.
دغه ایراني چارواکي افغانستان د دې هیواد لپاره د سوداګرۍ لپاره کلیدي شریک بللی، ځکه چې دا هېواد د غني معدني ذخایرو لرونکی دی.
مظفري د چهارشنبې په ورځ، د خراسان رضوي په اتلسم نړیوال نندارتون کې خبریالانو ته ویلي، چې ایران او طالبان په دوهغارون سیمه کې د یوه ځانګړي اقتصادي او معدني زون د جوړولو لپاره کار کوي.
د دې پروژې هدف د قیمتي ډبرو د پروسس او نړیوالو بازارونو ته د صادراتو لپاره یو مرکز جوړول دي.
هغه زیاته کړه: “ایران د قیمتي ډبرو د پروسس پراخه تجربه لري او دا صنعت کولی شي د افغان سوداګرو په همکارۍ نړیوال معیار ته لوړ شي. دا همکاري به د دواړو خواوو لپاره ګټوره وي.”
د خراسان رضوي والي همداراز د افغان سوداګرو رول ته اشاره کړې، چې د خپل هېواد اړتیاوې له ایران څخه پوره کوي، او ویلي یې دي چې تیر کال، ایران افغانستان ته له ۲.۲ میلیارد ډالرو څخه زیات صادرات درلودل.
هغه ټینګار کړی چې د ایران موخه له افغانستان سره د سوداګریزو همکاریو پراخولو له لارې د اقتصادي توازن لوړول دي.
په وروستیو کلونو کې د طالبانو او ایران اړیکې په چټکۍ پراخې شوې دي، او د ایران حکومت، د دې هېواد د ولسمشر په مستقیمه لارښوونه، هڅه کوي له افغانستان سره سوداګریزو او اقتصادي همکاریو ته پراختیا ورکړي.
