ایکس پرېمیوم ته د کاروونکو هڅول؛ ایکس پر غیر پرېمیوم حسابونو نوي محدودیتونه ولګول
د ټولنیزې شبکې «ایکس» یا پخواني ټویټر ادارې د هغو کاروونکو لپاره نوي محدودیتونه اعلان کړي چې د «ایکس پرېمیوم» غړیتوب نه لري. دغه بدلونونه داسې مهال پلي کېږي چې شرکت هڅه کوي ډېر کاروونکي د پیسو په بدل کې د ایکس پرېمیوم خدمت ته جذب کړي.
د ایکس د تازه پالیسۍ له مخې، غیر پرېمیوم کاروونکي به اوس په ورځ کې یوازې ۵۰ اصلي پوسټونه خپرولای شي، حال دا چې مخکې د پوسټونو حد تر ۲۴۰۰ پورې و.
همداراز، عادي کاروونکو ته به په ورځ کې یوازې د ۲۰۰ ځوابونو، ۵۰۰ مستقیمو پیغامونو او د ۴۰۰ نویو حسابونو د تعقیب اجازه ورکول کېږي.
ایکس پرېمیوم ته د خلکو د هڅولو نوې تګلاره
د ایکس اداره وایي، دغه محدودیتونه د سپم، جعلي حسابونو او اتومات بوټونو د مخنیوي لپاره وضع شوي دي، خو ډېری کارپوهان باور لري چې شرکت غواړي خلک د ایکس پرېمیوم غړیتوب اخیستو ته وهڅوي.
شرکت دا هم ویلي، کاروونکي به ونه شي کولای چې په یوه ساعت کې تر څلورو زیات ځل د خپل حساب برېښنالیک بدل کړي.
راپورونه ښيي، نوي محدودیتونه به تر ټولو ډېر پر خبریالانو، د ټولنیزو رسنیو فعالانو، انفلوینسرانو او د سوداګریزو برانډونو پر مدیرانو اغېز وکړي، ځکه هغوی هره ورځ ګڼ پوسټونه او ځوابونه خپروي.
غیر پرېمیوم کاروونکي له محدودیتونو سره مخ کېږي
ایکس خبرداری ورکړی، که یو غیر پرېمیوم کاروونکی له ټاکل شویو حدونو واوړي، نو سیسټم به یې فعالیت محدود کړي او یا به اړ شي د بیا پوسټ کولو لپاره انتظار وباسي.
د ټکنالوژۍ شنونکي وایي، د ایلان ماسک تر مشرۍ لاندې ایکس هڅه کوي د خپلو عایداتو ډېره برخه د ایکس پرېمیوم له ګډونونو ترلاسه کړي، ځکه شرکت په وروستیو میاشتو کې د اعلانونو له بازار سره هم له ستونزو مخ شوی دی.
