په افغانستان کې د بریتانیا سفارت شازدافر د طالبانو له بهرنیو چارو وزیر سره لیدلي
په افغانستان کې د بریتانیا د سفارت شارژدافیر روبیرت ډیکسن، چې له دوحې خپلې چارې تر سره کوي، کابل ته تللی او د طالبانو حکومت کې یې د بهرنیو چارو له چارسمبالي وزیر ملا امیر خان متقي سره کتلي دي.
د طالبانو د بهرنیو چارو وزارت بیان کې راغلي، چې په دې کتنه کې امیر خان متقي غوښتنه کړې،چې بریتانیا دې د افغانستان واقعیتونه په نظر کې ونیسي او د طالبانو له حکومت سره دې تعامل وکړي.
خو د بریتانیا سفارت او په خپله ښاغلي ډیکسن ددې کتنې په اړه څه نه دي ویلي.
تمه کېږي چې طالب استازي د ملګرو ملتونو غونډې ته وبلل شي
له بلې خوا د طالبانو حکومت کې د لومړي وزیر سیاسي مرستیال دفتر ویلي ملګري ملتونه به طالب استازي هغې غونډې ته وربولي ،چې ټاکل شوې د روان کال تر پایه د افغانستان په اړه د ملګرو ملتونو له خوا جوړه شي.
د باختر دولتي خبري اژانس د رپوټ له مخې افغانستان کې د ملګرو ملتونو د استازولۍ د سیاسي څانګې مسؤول سکاټ سمېت د طالبانو د لومړي وزیر د مرستیال د دفتر له مشر مولوي ذاکر سره خبرو کې ویلي دا غونډه به د دوحې د غونډې په څېر وي.
نور ولولئ: کابل ته د هندي پلاوي لومړی سفر؛ امیرخان متقي لهدې پلاوي سره کتلي
د دوحې غونډه شاوخوا دوې میاشتې وړاندې جوړه شوې وه او د افغانستان لپاره د هېوادونو ځانګړو استازو او د ملګرو ملتونو سرمنشي په کې برخه لرله.
یوناما لا د دې کتنې په اړه څه نه دي ویلي.
له نړیوالو د طالبانو د رسمیت تمه
طالبان له نړیوالو تمه لري چې د دوی حکومت په رسمیت وپېژني او په ملګرو ملتونو کې د افغانستان چوکۍ چې تر اوسه د پخواني جمهوریت په نوم د هغه وخت له نماینده سره ده، د دوی استازي ته ورکړي، خو ملګرو ملتونو تر اوسه نه یوازې دا چوکۍ نه ده ورکړي بلکې طالبان هغو نړیوالو کنفرانسونو ته هم نه بلل کېږي چې د افغانستان په اړه په کې بحثونه کېږي.
نړیوال وايي چې طالبان باید په افغانستان کې ټولګډونه حکومت جوړ کړي او له افغانانو مشروعیت واخلي، خو طالبان نه تر اوسه د خپل نظام تعریف لري، نه یې اساسي قانون جوړ کړي او نه د ټولګډونه حکومت جوړېدو ته زړه ښه کوي. شننونکي وايي چې طالبانو د نړیوالو شرایط نه دي پوره کړي خو بیا هم مشروعیت او رسمیت غواړي.
