اړوند خبر:
اوچا: له افغان کډوالو سره د مرستو کچه باید پراخه شي
پولیسو په بلغاریا کې د ۲۴ افغان پناه غوښتونکو د نیول کېدو خبر ورکړی دی چې د ترکیې پولې ته څېرمه په یوه لارۍ کې انتقالېدل. چارواکي وایي، دغو کسانو د اروپا نورو هیوادونو ته د تېرېدو لپاره قاچاقبرو ته زرګونه یورو ورکړي وو او د سختې ستړیا ترڅنګ په بد جسمي وضعیت کې ول.
د بلغاریا رسنیو اعلان کړی چې پولیسو د ترکیې پولې ته نژدې یوه لارۍ درولې او ۲۴ افغان پناه غوښتونکي یې نیولي دي.
د راپورونو له مخې، ډېری پناه غوښتونکي د اوبو له کمښت او بېحالۍ سره مخ وو چې له لومړنیو طبي پاملرنو وروسته د اصلي کډوالو مرکز ته ولېږدول شول.
د بلغاریا رسمي خبري اژانس خبر ورکړی چې موټر چلوونکي د پولیسو د درېدو امر ته پام ونه کړ، موټر یې له کنټروله ووت، له څو پارک شویو موټرو سره ټکر شو او بیا یې د تښتېدو هڅه وکړه، خو پولیسو هغه له یوه بل کس سره، چې د ده همکار و، او دواړه د بلغاریا اوسېدونکي دي، ونیول.
بلغاریا له ترکیې سره د ګډې پولې له امله د اروپايي اتحادیې هیوادونو ته د افغانانو او د منځني ختیځ د پناه غوښتونکو لپاره د ننوتلو یوه مهمه لار شمېرل کېږي. سره له دې چې د صوفیې حکومت د سرحدي امنیت د پیاوړتیا او له ګاونډیو هېوادونو سره د همکارۍ هڅې زیاتې کړي، د انساني قاچاق لارې لا هم فعاله دي.
پولیسو په بلغاریا کې د ۱۴۰۱ کال د سلواغې پر ۲۸مه هم اعلان کړی و چې د ۱۸ افغان پناه غوښتونکو جسدونه، چې یو ماشوم هم په کې شامل و، پلازمېنې صوقیې ته نژدې په یوه پرېښودل شوې لارۍ کې موندل شوي او څلور کسان یې په تړاو نیول شوي دي.
د بلغاریا د کورنیو چارو وزارت هم ویلي و چې دا پناه غوښتونکي په هغه لارۍ کې پټ کړل شوي وو چې د لرګیو بار یې درلود، او ۱۸ تنه د اکسیجن د کموالي له امله خفه شوي وو.
« د بلغاریا د ملي تحقیقاتي خدمت مشر بوریسلاو سارافوف» خبریالانو ته ویلي و چې پناه غوښتونکي په ناقانونه ډول د ترکیې له پولې تېر شوي، دوه ورځې یې په ځنګل کې پټې تېرې کړي او وروسته د بلغاریا د جنوب ختیځ یامبول ښار ته څېرمه په یوه لارۍ کې بار کړل شوي وو.
