راپورونه وايي، وسله والو بلوچستان کې د سکرو کانونو شل مزدوران وژلي چې ۴ پکې هم افغانان دي
ناپېژانده وسله والو د بلوچستان په دوکي ولسوالۍ کې په یوه برید کې د سکرو کانونو لږترلږه ۲۰ کاریګر وژلي او ۷ نور ټپي کړي دي.
ځايي چارواکو ویلي، برید دوکي ښار ته نږدې سیمه کې شوی.
دوکي کې د پولیسو یوه ځايي مشر ‘همایون خان ناصر’ ویلي، ناپېژانده وسله وال دې سیمې ته ورغلي او پر کاریګرو یې ډزې کړې دي.
پاتې ۱۶ کسان د بلوچستان دي
د نوموړي په وینا په وژل شویو کې څلور افغانان او پاتې د بلوچستان د کلاسیفالله، ژوب، پښین، موسیخېل او کچلاک اوسېدونکي دي.
تر اوسه کومې ډلې د دغه برید مسوولیت نه دی منلی.
خو مخکې په بلوچستان کې د دا راز ګڼو بریدونو پړه د بلوڅ بېلتونپالو ازادي غوښتونکي پوځ ‘بياېلاې’ په غاړه اخیستې ده.
نور ولولئ: پاکستان کې یوه جومات ته نژدې برید شاوخوا ۵۲ تنه وژلي دي
نور ولولئ: شمالي وزیرستان کې پر پاکستاني پوځیانو برید؛ ۶ هلاک شوي او ۲۴ ژوبل دي
یو ځايي خبریال عبدالحکیم ناصر وايي، د دې پېښې خلاف نن د دوکي په مرکزي څلورلاره کې د احتجاج پرېکړه شوې.
هغه زیاته کړې چې په ښار کې نن هټۍ او کاروباري مرکزونه هم تړلي دي.
پر مزدورانو ګڼ خونړي بریدونه
د بلوچستان د اطلاعاتو مخکیني سرپرست وزیر جان اڅکزي هم د اېکس خواله رسنۍ یوه پیغام کې په دغه برید کې د ۲۰ کاریګرو د وژل کېدو خبره کړې.
د یادونې ده چې روان کال د بلوچستان په بېلابېلو سیمو کې د کانونو او نورو طبیعې زېرمو پر مزدورانو ګڼ خونړي بریدونه شوي، چې تر ډېره پکې پنجابي کاریګر هدف ګرځېدلي دي.
برید د دوکي ښار د سویل شاخوا اته کیلومترۍ کې په پرتې خیرمحمد ناصر لیز سیمه کې شوی.
د دوکي د پولیسو اېساېچاو همایون خان ناصر وايي، ګڼ شمېر “ناپېژانده وسله والو” برید کې برخه اخیستې.
د نوموړي په وینا وسله والو د کاریګرو پر وژلو سربېره د سکرو بېلابېلو کانونو کې د کیندنې وسایل او ماشینونه هم سېځلي دي.
هغه زیاته کړې چې د وژل شویو کاریګرو مړي عدلي طب او ټپيان درمنلې لپاره د ولسوالۍ مرکزي روغتون ته لېږدول شوي دي.
د رسنیو د راپورونو پر اساس، په پاکستان کې ناامني اوج ته رسېدلي ده. دغه ناامني دومره پراخه شوې چې هره ورځ د پاکستان د پوځ او نورې امنیتي دستګاه په لسګونه کسان وژل کېږي او ټپیان کېږي.
داسې هم ویل کېږي چې د ناامنۍ له امله د پاکستان اکثره پانګوال له دغه هېواده خپله سرمایه باسي او نورو هېوادونو ته یې لېږدوي.
