تمیم اقبال د بنګلهدیش له لومړۍ وزیري سره له لیدو وروسته د تقاعد پرېکړه بېرته واخیسته
د بنګله دېش ملي لوبډلې لوبډلمشر تمیم اقبال د دغه هېواد لومړۍ وزیرې شیخ حسینه له مداخلې وروسته د خپل تقاعد پرېکړه بېرته واخیسته.
تمیم تېره ورځ د یوې خبري غونډې پر مهال په داسې حال کې له کرېکټ سره خدای پاماني وکړه چې له سترګو یې اوښکې بهېدې.
د دوی ناسته د جمعې په ورځ ماسپښین په ډاکه کې د لومړۍ وزېرې په کور کې وشوه. تمیم له خپلې مېرمنې، پخواني کپتان مشرفي مرتضي او د بنګله دېش کرېکټ بورډ مشر نظم الحسن سره یوځای له اغلې حسینې سره ولیدل.
د پارلمان غړي مشرفي هڅه
ویل کېږي چې د پارلمان غړي مشرفي لومړی په دې اړه هڅه پیل کړه او له لومړۍ وزیرې سره یې د احتمالي مداخلې خبره کړې وه. تمیم تر هغه مخکې د خپل تقاعد اخیستو په اړه د کرېکت بورډ له مشره سره له خبرو کولو ډډه کړې وه.
نور ولولئ: سريلانکا سره لوبلړۍ ته افغان کرکټ بورډ لوبډله اعلان کړه
نوموړي خبریالانو ته وویل، “دا زما د لوبو پای دی، تر خپله وسه مې هڅه کړې. له همدې شېبې له نړیوالو لوبو تقاعد کېږم.” د بنګله دېش دغه وتلي کرېکټ ستوري تېر کال له ۲۰ اوریزو نړیوالو لوبو سره مخه ښه کړې وه.
د بنګله دېش لوبډلې کپټان رسنیو ته ویلي، لومړۍ وزیرې نن خپل د استوګنې ځای ته وربللی وو.
نوموړي زیاته کړه، “موږ اوږدې خبرې وکړې او په پایله کې هغې هیله راڅخه وکړه چې بېرته کرېکټ ته راستون شم، ځکه نو زه بېرته د خپل تقاعد پرېکړه اخلم.”
لومړۍ وزیرې تمیم ته یوه نیمه میاشت دمه ورکړې
تمیم زیاتوي، “زه هر چا ته نه ویلی شم، خو دا ناشونې ده چې د هېواد تر ټولو مهم شخص ته نه ووایم. لومړۍ وزیرې دغه راز ما ته د یوې نیمې میاشتې دمې وخت راکړ. زه به په دې موده کې خپله درملنه وکړم او بېرته به کرېکټ ته راستون شم.”
ښاغلي اقبال په یوه ورځنیو لوبو کې د بنګله دېش لپاره ۸۳۱۳ منډې کړې دي او په ټېسټ لوبو کې یې بیا ۵۰۸۳ منډې جوړې کړې دي.
دا په داسې حال کې ده چې د شنبې په ورځ افغانستان له بنګله دېش سره دويمه يو ورځنۍ لوبه کوي. لومړۍ هغه افغانستان ګټلې وه او په راتلونکو لوبو کې به معلومه شي چې دغه جام څوک په خپل نوم کوي.
