په پلان کې ده چې نن د ایران په پلازمېنه تهران کې د افغانستان په اړه د تماس غونډه جوړه شي
د سیمې هېوادونه په دې هڅه کې دي چې د طالبانو له رژیم سره ښې اړیکې ولري او د خپل امنیت د خوندیتوب په موخه په افغانستان کې د داعش ګواښ له منځه لاړ او امن پاتې وي.
له پاکستان پرته د سیمې هېوادونه غواړي چې له افغانستان سره خپل پراخ تجارت او سیاسي اړیکې لا خوندي او د ځان په ګټه مخکې یوسي.
په تهران کې د سیمهییزو هېوادونو د تماس غونډه
نن د ایران پلازمېنه تهران کې د افغانستان په اړه د سیمې د هېوادونو د تماس غونډه جوړېږي.
د ایران د بهرنیو چارو وزارت سلاکار سید رسول موسوي په خپله اېکس پاڼه لیکلي، چې دغه ناسته به په افغانستان کې د سولې، پرمختګ او ټیکاو زېری له ځانه سره ولري.
نور ولولئ: له چین د مولوي کبیر غوښتنه: د شنګهای راتلونکې غونډه کې د ګډون بلنه راکړئ
نور ولولئ: افغانستان به د شنګهای غونډې د بحث سرټکی وي
په دغې ناسته کې به له طالب استازو پرته د ایران، پاکستان، چین او روسیې استازي برخه ولري.
د ایران خبري اژانس اېرنا لیکلي، چې دا د افغانستان لپاره د سیمهییز تماس دویمه ناسته ده.
په کابل کې د تماس غونډې جورېدل
د اېرنا د راپور له مخې، د افغانستان په اړه د سیمهییز تماس لومړنۍ غونډه د ۱۴۰۲ کال د کب په میاشت په کابل کې جوړه شوې وه چې د سیمې د هېوادونو استازو او سفیرانو په کې برخه لرله.
دغه ناسته د دوحې د درېیمې ناستې په درشل کې جوړېږي، چې په پام کې ده د ملګرو ملتونو د سرمنشي په کوربهتوب د دوحې ناسته د چنګاښ میاشتې په ۱۰مه او ۱۱مه نېټه په قطر کې جوړه شي.
پر دې سربېره، طالبان هڅه کوي چې د ملګرو ملتونو تر مشرۍ لاندې په قطر کې درېیمه ناسته د ځان په ګټه وڅرخوي او دوی وايي، په دې غونډه کې باید ددوی ګډون ماناداره وي.
طالبانو ملګرو ملتونو ته په یاده غونډه کې د ګډون کولو شپږ شرطونه وړاندې کړې چې یو هم په کې د نجونو پر زده کړو بحث نه کول دي.
طالبان بل ټینګار دا کوي چې د ملګرو ملتونو له لوري د افغانستان لپاره د ځانګړي استازي ګومارلو ته اړتیا نشته، خو دغه سازمان غواړي چې په دې برخه کې ځانګړی استازی ولري.
د یادونې وړ ده چې طالبان د روسیې له لوري د ترهګرو له تور لېست څخه هم ویستل کېږي.
