اړوند خبر:
د ټرانس افغان ریل لاره: ازبکستان به د کندهار یا د مزارشریف لار غوره کړي؟
د طالبانو د حکومت ټولګټو چارو وزارت وایي، چې د روان کال په تېر غويي ـ ثور میاشت کې د اوسپنې پټلۍ له لارې ۳۳۲ زره ۸۳۷ مټریک ټنه صادرات او واردات شوي دي.
د یاد وزارت په خبرپاڼه کې راغلي، چې د حیرتان بندر له لارې ۲ لکه ۴۷زره ۴۲ ټنه د آقینې بندر له لارې ۳۲زره ۱۱۷ ټنه د تورغونډۍ بندر له لارې ۲۳ زره ۱۶۸ ټنه د خواف-هرات له لارې ۳۰ زره ۵۰۹ ټنه نفتي، غیرنفتي او نور مواد وارد او صادر شوي دي.
د خبرپاڼې له مخې د انتقالاتو له ډلې یوه برخه ټرانزيټ او صادرات دي.
دغه راز په ثور میاشت کې ۱۶ زره ۷۷۲ ټنه ټرانزيټ او صادرات شوي دي.
د یادې اندازې صادراتو لویه برخه وچه مېوه، معدني ډبرې، کچالو، وريجې او د انارو جوس شامل دي.
په دې وروستیو کې له افغانستانه د صادراتو او وارداتو کچه په زیاتېدو ده، چې دا چاره د نظر خاوندان د اقتصاد په ځان بسیا کېدو کې هیله مندي بولي.
اقتصاد پوهان ،د صادارتو او وارداتو ارزښت د هېواد د اقتصادي ثبات، نړیوالو اړیکو، او د تولیدي سکتور د ودې مهم شاخص ګڼي.
دوی وایي، که څه هم واردات د داخلي اړتیاوو پوره کولو لپاره اړین دي، خو د صادراتو زیاتوالی کولای شي هېواد ته اقتصادي ځواک، د اسعارو عاید، او د کار فرصتونه برابر کړي.
