د جلغوزیو حاصلات سږ کال په نورستان او کاپیسا ولایتونو کې د تېر کال په پرتله زیات شوي دي. د نورستان د کرنې، اوبولګولو او مالدارۍ ریاست وايي، اټکل کېږي چې سږ کال به د دغه ولایت له طبیعي ځنګلونو شاوخوا ۱۲۸ مټریک ټنه جلغوزي راټول شي.
نورستان کې د ۷.۵ میلیونه افغانیو عاید اټکل
د نورستان د کرنې ریاست د معلوماتو له مخې، د جلغوزیو د راټولولو او مدیریت له لارې به سږ کال شاوخوا ۷.۵ میلیونه افغانۍ عاید ترلاسه شي.
مسوولان وايي، د جلغوزیو د طبیعي ځنګلونو ښه مدیریت، د راټولونکو د ظرفیت لوړول او د روزنیزو پروګرامونو ترسره کول د حاصلاتو د زیاتوالي له مهمو عواملو څخه دي.
د معلوماتو له مخې، د نورستان په مرکز او ولسوالیو کې شاوخوا ۳۱۱۵ هکټاره طبیعي ځنګلونه د جلغوزیو ونې لري.
کاپیسا کې هم حاصلات ۴۰ سلنه زیات شوي
په ورته وخت کې، د کاپیسا د کرنې ریاست مسوولان وايي، چې په دغه ولایت کې سږ کال د جلغوزیو حاصلات د تېر کال په پرتله ۴۰ سلنه زیات شوي دي.
دوی وايي، په کاپیسا کې شاوخوا ۱۱ زره هکټاره ځمکه د جلغوزیو ځنګلونو پوښلې ده او سږني جلغوزیو حاصلات د تېر کال په پرتله د پام وړ زیاتوالی ښيي.
جلغوزي د غرنیو سیمو د خلکو مهم عاید
جلغوزي د افغانستان له مهمو وچو مېوو څخه دي چې د هېواد په یو شمېر غرنیو ولایتونو کې د خلکو د عاید له مهمو سرچینو څخه بلل کېږي.
افغان جلغوزي په کورني بازار سربېره بهرنیو بازارونو ته هم صادرېږي او د لوړ کیفیت له امله یې په سیمه کې د پام وړ تقاضا شته. د کرنې وزارت هم په بېلابېلو ولایتونو کې د جلغوزیو د تولید او د طبیعي ځنګلونو د مدیریت پر ښه والي تمرکز کړی دی.
