مولوي عبدالسلام حنفي د اسلامي هیوادونو له پانګوالو غوښتنه کړې چې خپلې پانګې دې په افغانستان کې په کار واچوي
د باختر دولتي خبري آژانس د راپور له مخې د افغانستان اسلامي امارت د لومړي وزیر اداري مرستیال مولوي عبدالسلام حنفي د افغانستان لپاره د اسلامي همکاریو سازمان له ځانګړي استازي سره لیده کاته کړي.
د دې لیدنې په جریان کې حنفي د افغانستان لپاره د اسلامي همکاریو سازمان ځانګړي استازي طارق علي بخیت څخه غوښتنه کړې چې د اسلامي هیوادونو سوداګر دې د کانونو، انرژۍ تولید او مواصلاتو په برخه کې په افغانستان کې پانګونه وکړي.
نوموړي ویلي چې د دې سازمان غړي هیوادونه دې په افغانستان کې پر پانګونه سربیره په نورو بیلابیلو برخو لکه د بشري ځواک ظرفیت لوړونه، روغتیا او نورو کې هم پاملرنه وکړي.
په دې لیدنه کې د اسلامي همکاریو سازمان غړو د بهرنیو چارو وزیرانو د غونډې په اړه هم خبرې شوې
د دې لیدنې په جریان کې ښاغلي بخیت ویلي چې د اسلامي همکاریو نړیوال سازمان غړو هیوادونو د بهرنیو چارو وزیرانو په غونډه کې له افغانستان سره د بشر دوستانه مرستو پر دوام ټینګار شوی.
نوموړي په دې اړه څرګنده کړې: په دې ناسته کې پر بشردوستانه مرستو سربیره په نورو برخو کې پر مرستو په ځانګړي ډول په پراختیایي برخه کې هم ټینګار شوی او پریکړه شوې چې د افغانستان د اړتیاوو مالومولو لپاره دې یو فني او تخنیکي ټیم سیمې ته ولیږل شي.
د افغان سرپرست حکومت مرستیال د افغانستان او اسلامي همکاریو نړیوال سازمان تر منځ ښې اړیکې وستایلې او ویې ویل چې د اسلامي همکاریو سازمان کولی شي په افغانستان کې ارزښتمن او مثبت رول ولوبوي.
په پام کې ده چې د اسلامي علماوو یو پلاوی هم افغانستان ته سفر وکړي
د اسلامي همکاریو نړیوال سازمان استازي د دې لیدنې په جریان کې ویلي چې ژر به د اسلامي علماوو یو پلاوی هم افغانستان ته سفر وکړي او له طالب چارواکو سره پر بیلابیلو موضوعاتو خبرې اترې وکړي.
حنفي د اسلامي امارت مثبتو کړنو ته هم اشاره وکړه
د اسلامي امارت مرستیال د دې کتو په جریان کې د حکومت هغو مثبتو کړنو ته اشاره وکړه چې پر هیواد د طالبانو له واکمنیدو راپدیخوا یې تر سره کړې دي.
نور ولولئ: متقي: نړۍ دې له ا.ا سره مثبت تعامل پيل کړي
نوموړي وویل چې په ټول هیواد کې سرتاسري سوله ټینګه شوې، عمومي عفوه اعلان شوې، اداري فساد له منځه تللی او د نشه یي توکو کرکېله او قاچاق هم له منځه تللی چې د نړۍ لپاره یو لوی مصیبت و.
عبدالسلام حنفي له طارق علي بخیت څخه غوښتنه کړې چې که د اسلامي امارت استازي د دې سازمان بیلابیلو غونډو ته وبلل شي او مخامخ د نظریاتو شریکولو زمینه برابره شي ښه پایله به ولري.
