خلیل الرحمان حقاني اصل کې پخوانی مجاهد و چې وروسته یې بیا کورنۍ له طالبي حرکت سره یو ځای شوه
خلیل الرحمان حقاني (د جلال الدین حقاني) ورور په لویه پکتیا کې پروت د ځدراڼو له لوی او تاریخي قوم څخه و. نوموړی په ۱۹۶۶ کال د افغانستان پکتیا ولایت د ګردې څېړۍ ولسوالۍ په کنډو کلي کې زیږېدلی دی.
د طالبانو د حکومت د کابینې له اعلان راهیسې د کډوالو او بېرته راستنېدونکو چارو وزیر په توګه وګومارل شو او تر وژل کېدو پورې په همدې مقام پاتې شو.
هغه په وزارت کې هڅه کوله چې نړیوالې مرستې جلب کړي، په ځانګړې توګه په تېرو دوو کلونو کې چې پاکستان او ایران د افغان کډوالو د جبري ایستلو بهیر پیل کړ او دواړو هېوادونو شاوخوا دوه نيم ميليونه کسان افغانستان ته ستانه کړل.
د خلیل الرحمان حقاني زوکړه او ژوند
دی د پلار کشری زوی و، نوموړي په یوه مرکه کې ویلي، ماشوم و چې پلار یې مړ شو او په وړکتوب کې یې شپني کوله او په تنکۍ ځوانۍ کې په جګړو کې ورګډ شوی و او په ۱۹۸۰مو کلونو کې د خپل مشر ورور جلال الدین حقاني د جهادي ډلې په لیکو کې د درنو وسلو او ذرهدارو قوماندان و.
نور ولولئ: خلیل حقاني: عبدالله عبدالله راسره همکاري کړې او له سیاف سره یې ۲۰ غونډې کړي
نور ولولئ: طالب ویاند: د خلیل الرحمان حقاني وژنه د داعش کار دی
د حقانیانو کورنۍ په خوست کې له خپل کلي په لومړي ځل په ۱۹۷۵کې پاکستان ته کډوال شوي و او له هغه ځایه يې د داود خان د حکومت پر ضد په افغانستان کې د خرپ او ترپ جګړه او بریدونه پیل کړل.
خلیل الرحمان حقاني د شلمې پېړۍ اتیایمه لسیزه کې – هغه وخته چې د پخواني شوروي اتحاد ځواکونه افغانستان کې و، د روسانو پرضد جګړه کې برخه واخیسته.
له جلال الدین حقاني سره اوسېدل
د طالبانو د حکومت د لومړۍ واکمنۍ پر مهال له خپل مشر ورور جلال الدین حقاني سره یو ځای د کابل په وزیر اکبرخان کې اوسېده.
حقاني په یوه پخوانۍ مرکه کې ویلي، په ۲۰۰۱ کې امریکا کابل کې د ده پر کور بمبار وکړ، چې ګڼ کسان پکې ووژل شول، خو دی له کابله ووت.
نوموړی ويلي وو چې د امریکا او پاکستان په ګډو عملیاتو کې بندي شو چې په وینا یې “یو کال کوټه قلفي شوو، لاس او پښې او سترګې مو تړل شوې وې، کړیو زما پښې خوړینې کړې”.
پر دې سربېره، نوموړی د پاکستاني نظامیانو لخوا سخت شکنجه شوی هم و.
