د پاکستان دفاع وزیر د تاجکستان دفاع وزیر سره په لیدنه کې وايلي چې دواړو هېوادونو ته افغان ګاونډي خطر پېښ کړی
د پاکستان د دفاع وزیر خواجه محمد اصف د تاجکستان له دفاع وزیر شېرعلي میرزا سره په کتنه کې ویلي چې دواړه هېوادونه د خپل ګاونډيتوب له امله له افغانستان څخه له امنیتي ګواښونو سره مخامخ دي.
“اسوشیتد پرس” د خواجه اصف له قوله دا هم ویلي: “د افغانستان ټولې مسلې باید په سوله ییزه توګه حل شي.”
نور ولولئ: خواجه اصف:سپين بولدک کې نښته لومړی د افغانستان له خوا پیل شوه
د پاکستان د دفاع وزیر په سیمه کې د سولې او ثبات په ټینګښت کې د تاجکستان د رول د ستاینې په ترڅ کې د دغه هېواد له وسله والو ځواکونو سره د استخباراتي او تخنیکي همکاریو د زیاتولو غوښتنه وکړه.
د دواړو هېوادونو تر منځ پر دوه اړخیزو همکاریو ټینګار
په همدې حال کې د تاجکستان د دفاع وزیر ویلي چې هېواد یې له پاکستان سره د دوه اړخیزو اړیکو د پیاوړتیا لپاره کار کوي.
نریندرا مودي او افغانستان
تاجکستان ته د پاکستاني وزیر له سفر سره هم مهاله، پرونذد شانګهای د همکاریو سازمان د مشرانو د ۲۳مې مجازي غونډې د کوربه په توګه د هند لومړي وزیر “نریندرا مودي” د افغانانو د هوساینې او له افغانستان سره د بشري مرستو په رسولو کې د لا زیاتو هلو ځلو په کولو ټینګار وکړ.
نوموړي د طالبانو پر حاکم رژیم د پاکستان ادعا شوي سیوري ته په اشارې وویل، چې د افغانستان خاوره باید د افراطیت د خپرولو لپاره ونه کارول شي.
نریندرا مودي ټینګار وکړ: د افغانستان خاوره باید د ګاونډیو هیوادونو د بې ثباته کولو لپاره ونه کارول شي.
هندوستان او د پاکستان نور منتقدان دغه هېواد تورنوي، چې له افغان خاورې د طالبانو په مرسته د خپلو ګټو لپاره نور هېوادونه ګواښي، خو پاکستان شکایت لري چې خپله دوی ته هم له افغان خاورې خطر پېښ دی.
د طالبانو رژیم بیا دا ټولې ادعاوې بې بنسټه بولي
بل لورته چې کله طالبان په افغانستان کې واکمن شوي، ایران، تاجکستان او نورو ګاونډیو هېوادونو د امنیت او د نشه یي توکو د ډېرېدو په برخه اندېښنې ښودلي او دا اندېښنې یې د رسنیو په ګډون په نړیوالو او سیمه ییزو کنفرانسونو کې هم شریکې کړي دي، خو طالبان وايي چې دوی به چاته ددې اجازه ورنه کړي چې د افغانستان خاوره د نورو پر ضد وکارول شي خو تر اوسه یاد هېوادونه قانع نه ښکاري.
