داعش وايي، د بغلان جومات کې ځانمرګی برید دوی کړی
![thumbs b c 4bc7351bc00ae7a0ec11c1569e8f1120](https://afghannow.net/wp-content/uploads/2023/10/thumbs_b_c_4bc7351bc00ae7a0ec11c1569e8f1120-348x196.jpg)
پرون د جمعې په ورځ په بغلان کې د ننه جومات کې ځانمرګی برید وشو چې مرګ ژوبله لري
په افغانستان کې د طالبانو حکومت وايي، د بغلان ولایت مرکز پلخمري ښار یوه جومات کې چاودنې ۷ تنه وژلې او ۱۷ نور یې ټپیان کړي دي.
دغه چاودنه د پلخمري ښار په دوهمه ناحیه کې د “امام زمان” د شیعه ګانو په جومات کې د جمعې د لمانځه پر مهال شوې ده.
نور ولولئ: مجاهد: په افغانستان کې د داعش بریدونو یو نیم سلنه امنیت ګواښلی
د بغلان ولايت د اطلاعاتو او فرهنګ مشر مصطفی هاشمي له بی بي سي سره په خبرو کې د دغه ولايت د امنيه قومندانۍ د وياند له خولې دا “ځانمرګی بريد” بللی دی.
له ټپیانو شمېر له دې هم زیات ښودل کېږي
د دې پېښې د قربانیانو په اړه ضد او نقیض رپوټونه ورکړل شوي دي. طالب چارواکي وايي په دې برید کې اوه تنه وژل شوی او پنځلس نور ټپیان دي. خو ځینو رسنیو د سرچینو په حواله رپوټ ورکړی چې د وژل شویو او ټپیان شمېر له دې ډېر زیات دی.
د ایران تسنیم خبري اژانس د ځايي سرچینو په حوله رپوټ ورکړی چې په دې چاودنه کې لږ تر لږه ۳۰ وژل شوي او ۵۰ نور ټپیان دي. ځینې نورو رسنیو بیا د وژل شویو شمېر لږ تر لږه اتلس او د ټپیانو شمېر لسګونه تنه ښودلی دی. د شیعه مذهب پلویانو یوه خطیب پژواک خبري اژانس ته ویلي چې د مرګ ژوبلې شمېر له رسمي ډېر لوړ دی، او پام کې ده چې نږدې راتلونکې د تلفاتو کره شمېر معلوم شي.
نور ولولئ: قزاقستان په افغانستان کې د داعش له ودې اندېښنه ښودلي
د رویټرز خبري اژانس د رپوټ له مخې پر ټیلګرام یوه پیغام کې داعش ډلې اعلان وکړ چې پلخمري ښار کې د شیعه مذهب د پلویانو پر جومات برید دوی کړی.
ددې پېښې په اړه عینې شاهدان وايي
د سيمې يو اوسېدونکی شمس الله چې همدغه جومات ته څېرمه دوکان لري، بي بي سي ته وویل، هغه مهال چې غوښتل يې جومات ته ننوځي زوروره چاودنه وشوه.
نوموړی وايي، “ټپیان او یو شمېر مړي او شهیدان مو روغتون ته یووړل. ډېر حالت خراب و. دوستان، خپلوان، ملګري او ځینې ګاونډیان مو ټپيان شوي چې په ملکي روغتون کې دي. زموږ له اوو تر اتو ګاونډیان شهیدان شوي. د مړو شمېر تر اوسه معلوم نه دی، څېرې يې نه پېژندل کېږي.”
دی وايي، د چاودنې پر مهال شاوخوا څلور سوه کسان په جومات کې وو. یوه ځايي خبریال بیا د ځايي اوسېدونکو له قوله بي بي سي ته وویل چې چاودنه په لومړي کتار کې شوې.
د نظر خاوندان وايي چې طالبانو هم پخوا جوماتونو کې بریدونه کول او اوس داعش هغه لاره نیولي ده.